VAR Edhe Spanja i thotë "po" teknologjisë

Pasi presidenti i Ligës Spanjolle të Futbollit e përmendi në mbledhjen e së martës së kaluar, më në fund ka ardhur dhe konfirmimi i UEFA-s: Që nga sezoni i ardhshëm në Spanjë do të lejohet teknologjia në fushë ( VAR). Lajmin e ka bërë zyrtar Viktoriano Sançez Arminio, presidenti i komisionit arbitral spanjoll. Ndihma teknologjike do të vlejë vetëm për ndeshjet e kategorisë së parë, duke përjashtuar kështu nivelet e tjera të futbollit spanjoll, për të cilat parashikohet që të implementohet në sezonet pas atij 2018-' 19. Segunda Divizion ( Kategoria e Dytë) do të përfshijë VAR- in nga 2019-' 20, ndërsa për kategoritë më të ulëta nuk ka ende një datë të paracaktuar. VAR- i do të përdoret në formë eksperimentale edhe në disa takime të sezonit aktual, siç do të jetë për shembull në ndeshjen e Kupës së Mbretit mes Atletikos së Madridit dhe Eibarit. Mes kampionateve të mëdha, sistemi VAR përdoret në Gjermani, Holandë dhe Itali, sigurisht me disa ndryshime në varësi të vendit, siç ndodh për shembull në Itali, ku arbitrat përgjegjës qëndrojnë në një furgon të pajisur me të gjitha mjetet, ose si në Bundesligën gjermane, ku arbitrat e "VAR"- it "gjykojnë" nga një shtab i përgjithshëm me qendër në Berlin. Ideja aktuale e Federatës Spanjolle të Futbollit është që teknologjia të përdoret në 60 ndeshje të sezonit 2017-' 18. Bordi ndërkombëtar, bëjnë të ditur nga federata spanjolle, do të nisë në ditët në vazhdim projektin me trajnimet përkatëse për arbitrat që do të jenë pjesë e kësaj risie.