Tjetër zhgënjim për femrat kuqezi

Vazhdojnë paraqitjet e turpshme edhe në ndeshjen e dytë të Europianit të basketbollit

Ndoshta humbja mund të pritej, por pas disfatës së parë 85-pikëshe, pritej diçka më shumë, shumë herë më shumë ndoshta, por ndërkohë dështojmë edhe më keq. Mbrëmjen e djeshme, Kombëtarja e femrave të basketbollit merr një tjetër shuplakë të fortë nga Hungaria, e cila triumfon me shifrat 137-48, sfidë e vlefshme për Grupin C, për kampionatin Europian 2019. Nëse mendohej se nga ndeshja e parë, e luajtur në Tiranë, ku u shkatërruam nga Rusia në shifrat 122-37 (85 pikë diferencë të pësuara pesë ditë më parë), dje ishte një tjetër zhgënjim i madh duke konfirmuar se basketbolli ynë me pjesën tjetër të kontinentit ka një hendek të frikshëm. Sërish pësojmë mbi 100 pikë, por mbi të gjitha sa më shumë ndeshje kalojnë, aq më e thellë bëhet edhe humbja, e cila na bën që ta meritojmë plotësisht vendin e fundit në grup. Dueli i djeshëm gjithashtu nuk pati histori për ne sepse nga perioda e parë e deri në të fundit, jo vetëm morëm leksion, por nuk mundëm asnjëherë

që të rivalizonim denjësisht. Natyrisht që kombëtarja jonë është e formuar nga vajza të grupmoshave të ndryshme, por sërish është e rëndë që të mundesh kaq thellë. Trajneri i Shqipërisë, Viron Toska, edhe pse tentoi të eksperimentojë zgjedhje të ndryshme brenda formacionit gjatë të gjithë takimit, të gjitha provat e tij nuk dhanë rezultat. Ashtu siç pranoi vetë Toska në sfidën e parë: "Problemi më i madh që vuajtëm te rivalet hungareze, ashtu sikurse te ruset, ishte gjatësi, diferencë centimetrash dhe teknike pa dyshim, që na bëri të dorëzoheshim shumë lehtë, derisa në fund na duhej të pranonim humbjen 137-48. Për sa i përket sfidës së radhës, ndaj Lituanisë, ajo do të luhet në muajin shkurt të vitit të ardhshëm, me shpresën se deri atëherë do të kemi përmirësuar të paktën bashkëpunimin në parket, për të shmangur një tjetër humbje 85 apo 89 pikëshe diferencë".