Turbina ngec sërish, presidenti Gjoka: Iki nëse biem
Kreu i klubit vë bast me veten, garanton tifozët
Turbina ka hedhur sërish një hap fals në shtëpi. Cërrikasit kanë barazuar pa gola me Ilirinë duke shpërdoruar kështu një mundësi ideale për të marrë tri pikët. NDESHJA
Formacioni i trajnerit Sinan Bardhi ka dominuar totalisht takimin, ndonëse nuk ka mundur të konkretizojë epërsinë e tyre. Miqtë tentuan fillimisht kuadratin me Doçin. Ndërkohë vendësit reagojnë me Bakiun dhe Sallakun, por pa rezultat. Pas disa insistimeve të njëpasnjëshme, cërrikasit sërish nuk arrijnë të ndryshojnë asgjë. Fraksioni i dytë i lojës nis furishëm për vendësit. Agalliu pengohet brenda zonës dhe arbitri akordon 11- metërsh. Por, kapiteni Klevis Roshi është i pasaktë nga pika e bardhë duke goditur mbi traun e portës. Në minutat vijuese janë Dollani dhe Sallaku që kanë të tjera raste për shënim. Gjithsesi minutat kalojnë dhe presioni shtohet mbi vendësit. Pritshmëritë janë të larta në kampin cërrikas, por skuadra e tyre nuk arrin të zhbllokohet. Përfundimisht sfida fiksohet në këto shifra duke zhgënjyer pa dyshim të gjithë tifozërinë vendëse, ndërkohë që skuadra vijon regresin në klasifikim duke mbetur në vendnumëro. PRESIDENTI
Presidenti i Turbinës, Gentjan Gjoka, pas ndeshjes tha: "Më vjen keq që nuk e fituam këtë takim, pasi e dominuam atë. Turbina do të qëndrojë në Kategorinë e Parë, pra unë garantoj që ne do të mbijetojmë në këtë ligë. Nëse skuadra bie nga kategoria, unë do të jap dorëheqjen dhe do të largohem. Në merkaton e janarit do afrojmë disa lojtarë cilësorë dhe do përforcohemi shumë". Florenc Manari