Zhbllokohet Vidal, Bajerni fiton derbin dhe merr arratinë
Hejnkes feston fitoren e 500-të, Dortmundi 9 pikë larg
Tetë fitore në 8 ndeshje, por ajo që bën më shumë përshtypje është se janë 500 fitore në Bundesligë (duke përfshirë si karrierën si futbollist, ashtu edhe atë si trajner). Jup Hejnkes hyn gjithnjë e më shumë në librat e historisë së Bundesligës. Vetëm Oto Rehagel i ka fituar më shumë se ai 3 pikët. Trajneri 72-vjeçar i ka bërë një kthesë sezonit të Bajernit të Mynihut, që me të në stol ka fituar gjithnjë. Dhe me 3 pikët e fituara në derbin ndaj Augsburgut, në javën e 12-të të Bundesligës, kampionët arratisen në +9 pikë nga Dortmundi dhe 6 nga Lajpcigu. Ndeshjen e vulosin golat e Vidalit (31') dhe dopieta e Levandovskit (38' dhe 49').
NDESHJA - Augsburgu prezantohet me një 4-1-4-1 dhe një qasje mbrojtëse. Për pjesë të gjata të ndeshjes, Bajerni, pavarësisht dominimit, nuk arrin të gjejë goditjen vendimtare. Rasti i parë i vërtetë për gol vjen vetëm në minutën e 14-të: Bernat shkëmben me Vidalin, i cili shërben Levandovskin në shtyllën e parë, por goditja e sulmuesit devijohet në goditje këndi nga Hic. Nga këndorja është Humels që shkëputet me kokë, por nuk inkuadron portën. I bllokuar në gjysmëfushën e vet, Augsburgu provon të reagojë vetëm në minutën e 22-të me Gregorish, i cili godet nga 30 metra, por pa arritur që ta vërë në vështirësi Ulraishin. Në minutën e 30-të vjen i vetmi rast për gol i miqve: nga goditja e
këndit të Maks, topi mbërrin te Kaibu, i cili provon me një gjuajtje fluturimthi, por që rezulton e pasaktë. Një minutë më vonë kalon në avantazh Bajerni: nga një goditje dënimi e Hames, Augsburgu nuk arrin të spastrojë zonën e penalltisë. Goditja e Vidalit bllokohet, ajo e Humelsit shpëtohet mbi vijën fatale, riprovon Vidal, i cili këtë herë e dërgon topin në rrjetë. Shtatë minuta më vonë, Vidal vjedh topin në mesfushë dhe shërben Levën, i cili mposht Hicin për herë të dytë. Në pjesën e dytë, bavarezët shfrenohen me goditjen fluturimthi të polakut, pas asistit të Kimishit. Augsburgu provon
të reagojë me Gregorish, por që bllokohet nga Rafinja. Ndeshja përfundon me aksionin klasik të Robenit në 73', por shënjestra e holandezit është e gabuar. Me vetëm 8 ndeshje, Hejnkes ka ndryshuar filozofinë e kësaj skuadre, e cila rikthehet kaq shpejt dominuesja e padiskutueshme e kampionatit.