Heroi me hajmali, Kamza dhuratë speciale për ditëlindjen e Qarrit
Të veçantat/ Frashëri i sfilitur, Idrizaj ngushëllon
Takimi i djeshëm ka pasur disa momente interesante gjatë dhe pas ndeshjes, në episode të caktuara apo edhe ndjesi të ish-lojtarëve të Skënderbeut. Gazeta rendit disa nga këto momente.
-Kanë qenë më shumë se 20 tifozë VIP të Kamzës që e ndoqën nga tribuna qendrore këtë takim. Si zakonisht ndeshjen e kësaj jave e kanë ndjekur së bashku presidenti i Skënderbeut, Ardjan Takaj, i shoqëruar nga zv. presidenti Arlind Boshku dhe kryebashkiaku Sotiraq Filo. Që të tre, të mërzitur nga barazimi, janë larguar menjëherë nga stadiumi. Pranë presidentit Takaj ka qenë edhe Naim Qarri, presidenti i Kamzës, si dhe Xhelal Mziu, kryebashkiaku i Kamzës. Presidenti Qarri kishte dhe ditëlindjen dje. Nuk kishte urim më të bukur për të se ai që i ka bërë ekipi sesa një pikë në Korçë përballë Skënderbeut. Qarri ka marrë urimet e ekipit dhe është larguar më pas me një dhuratë të bukur: pika e marrë në Korçë.
- Katër ish- futbollistë të Skënderbeut kanë qenë në fushë me fanellën e Kamzës. Plaku, Fukui, Idrizaj dhe Frashëri.
- Një banderolë speciale dedikuar Sebino Plakut është hapur në tribunë në fillim të pjesës së dytë të takimit. Baneri me emrin e sulmuesit i ka sjellë fat Plakut që ka gjetur rrugën e rrjetës.
-Enis Gavazaj ka hequr dje maskën për herë të parë. Lojtari ka hyrë në fushë pa mbrojtësen e fytyrës.
-Në fund të takimit, Suad Sahiti është përplasur frikshëm në tokë dhe është kërkuar që ambulanca të jetë prezente edhe pas ndeshjes. Mjekët, nuk e panë të nevojshme dërgimin në spital.
-Një dedikim special i golit të Marko Radasit ishte për Kristi Vangjelin. Mbrojtësi bardhekuq ka marrë një lajm të madh, teksa është shtuar me një fëmijë tjetër që gëzon shëndet të plotë.
-Ramadan Ndreu, trajneri i Kamzës, nuk është ulur për asnjë moment në pankinë. Madje nuk ka qëndruar asnjëherë brenda vijëzimeve të pankinës, por preferonte të qëndronte jashtë saj. E veçanta është se sa herë arbitri i katërt shkonte për ta këshilluar, kishte lumë ofendimesh nga tribuna e tifozëve të Kamzës. Edhe në momentin e golit të Plakut, kur i gjithë stoli hyri në fushë, arbitri i katërt kërkoi ndihmën e kryesorit Beqiri që të normalizonte situatën. Natyrisht kjo u shoqërua me sharje.
-Në fund të takimit, qoftë Frashëri ashtu edhe Idrizaj, i kanë thurur elozhe Skënderbeut. Madje Frashëri, me miqtë e tij pranë stadiumit, u ka treguar se ishte i sfilitur. "Jam i këputur, shumë i lodhur. Skënderbeu nuk ka lidhje me asnjë ekip tjetër në Shqipëri. Sot (dje) e pashë që duhet të jepje 200% që të mund të përballoje furinë e tyre, ndryshe nga ekipet e tjera që kërkojnë titullin. As kanë lidhje. Këta të Skënderbeut nuk merren vesh nga të vijnë dhe nga e çojnë topin". Idrizaj në krahun tjetër, pasi pyeti për diferencën 7 pikë, u shpreh me ish- shokët. "Hajde mos u mërzisni se diferencat janë të mëdha. Sërish jeni të parët".