Fitorja në Lushnjë i shpëton të kuqtë nga 4 mijë euro gjobë
Ultimatumi për 7 pikë skadon të dielën
Pas humbjes me Laçin, ndeshja e parë e fazës së dytë, drejtuesit e klubit zhvilluan një takim me ekipin, ku nuk munguan edhe "kërcënimet" me gjoba. Drejtuesit kërkuan reagimin e ekipit në tri javët në vazhdim dhe vunë si ultimatum marrjen e 7 pikëve në këto takime, ndonëse dihej se do të përballeshin me dy kryesueset. Dy ndeshjet e para, me Kukësin në transfertë dhe Skënderbeun, janë mbyllur brenda pritshmërive, pasi fituan me përmbysje 2-1 në "Zeqir Ymeri", si dhe barazuan 0- 0 me Skënderbeun në "Selman Stërmasi". Pra, në këto dy sfida kryeqytetasit grumbulluan katër pikë. Por për të përmbushur kërkesën e drejtuesve, si dhe për të shpëtuar gjobën, lojtarët e Partizanit duhet me patjetër që të fitojnë të dielën në Lushnjë. Nëse nuk fitojnë në "Roza Haxhiu", çdo lojtar pritet të gjobitet me të paktën 4 mijë euro. Kjo është shuma që është përmendur gjatë analizës së zhvilluar pas humbjes me Laçin, por ka edhe aludime që gjoba mund të shkojë deri në dy rroga mujore. Në sezonet e fundit, kryesisht kur ekipet janë përballur në Kategorinë e Parë dhe rivaliteti ka qenë shumë i lartë, të kuqtë kanë vuajtur në Lushnjë, kështu që as kësaj here nuk mendohet e lehtë. Lushnjarët arritën që t'i surprizojnë të kuqtë edhe në fazën e parë, pasi ndeshja e zhvilluar në "Selman Stërmasi" u mbyll në barazim pa gola. Duke ditur vështirësitë që ka Partizani në sulm, lojtarët duhet të jenë të përqendruar në maksimum që të marrin fitoren në Lushnjë e të evitojnë gjobën, por mund të jetë edhe ndonjë shkëndijë për ndonjë premio të mundshme.