Mungojnë Zguro dhe Abazaj, Luftëtari “i gjymtuar” përballë Flamurtarit

Në dyshim edhe Bregu, bluzinjtë tentojnë “misionin e pamundur”

Luftëtari, pas takimit me Bylisin në turin e dytë të Kupës së Shqipërisë, u është rikthyer përgatitjeve për ndeshjen e radhës. Flamurtari është ekipi ku Luftëtari do të kërkojë fitoren përballë tifozërisë në shtëpi. Pavarësisht humbjes 2- 1 në "Adush Muça" në Ballsh, Luftëtari i Hasan Likës, duke sfiduar motin me reshje, ka shfrytëzuar parketin e pallatit të sportit për të vijuar përgatitjet për Flamurtarin. Për trajnerin Hasan Lika, fitorja ndaj vlonjatëve, pa dyshim që është detyrë shtëpie, por kur bëhet fjalë se në dispozicion të tij pritet të mos jenë futbollistë si Abazaj e Bregu të dëmtuar, apo as Zguro i skualifikuar, ky mision bëhet më shumë se i vështirë.

SFIDA - Gjithsesi, për t'u përgatitur në mënyrën më të mirë të mundshme, si dhe për të hedhur "pas krahëve" ecurinë negative të deritashme, në kampin gjirokastrit besojnë se kualitetet e Luftëtarit janë të mjaftueshme për të përballuar me sukses çdo rival. Flamurtari, ekipi i një sezoni më parë që Luftëtari ka ditur t'i rrëmbejë nëntë pikë, do të jetë nesër në orën 14:00

kundërshtari ku gjirokastritët do të synojnë rikthimin e imazhit të munguar prej disa javësh në shtëpi.

MUNGESAT - Në përballjen me vlonjatët Luftëtari do të vuajë mungesën e sigurt të Vangjel Zguros, në krahun e majtë të mbrojtjes

mungesën e mesfushorit Kristal Abazaj, pas dëmtimit të pësuar në Ballsh, si dhe mungesën e vlonjatit Dejvi Bregu. Ky i fundit nuk u aktivizua nga trajneri Lika në ndeshjen me Bylisin për arsye gripale dhe dëmtimi të lehtë, por për të ka ende shpresa se mund të rikuperohet.

Nisur nga mungesat e pritshme të Abazaj, Bregut, mbetet në dyshim dhe e Zguros, për Luftëtarin rritet gjithnjë e më shumë shkalla e vështirësisë për të përballuar një Flamurtar dinjitoz në javët e deritanishme. Tomor Shehu