Femrat dhe Brigeli, Rraklli u rrëfehet gjermanëve
"Kosova na ka dëmtuar, dua të bëhem trajner në Gjermani"
Në Bundesligën gjermane kanë luajtur 19 futbollistë shqiptarë. I pari që ka shkruar historinë në këtë kampionat, ka qenë Altin Rraklli, që sot është në moshën 47vjeçare. Kjo është hyrja e intervistës së dedikuar nga gazeta prestigjioze gjermane "Bild", për ish- sulmuesin e Kombëtares shqiptare dhe ishtrajnerin e Kombëtares së femrave në vendin tonë. Rrakklli ka rrëfyer për gjermanet periudhën kur kuqezinjtë drejtoheshin nga Brigel, si dhe së fundmi aventurën e tij në krye të femrave kuqezi. Më poshtë, edhe shkrimi i dedikuar për Altin Rrakllin. MBËRRITJA
Në vitin 1992, qendërsulmuesi la vendlindjen e tij dhe u transferua te Fraiburg, në ligën e dytë gjermane. Atij, nuk iu desh shumë kohë për të njohur vendin e ri si dhe gjuhën e re, me të cilën do të kishte të bënte. "Një mik i imi u vendos në Fraiburg pas rënies së sistemit komunist në Shqipëri dhe më rekomandoi në atë skuadër. Pas dy javë prove, u pranova dhe nënshkrova një kontratë. Megjithatë, nga ana fizike nuk isha në formën e duhur për një kampionat si Bundesliga, duke qenë se në Shqipëri nuk stërviteshim mjaftueshëm mirë", tregon fillimisht Rraklli. Ai shpejt u përshtat me ritmin, braktisi Bundesligën e Dytë për të Parën. Më vonë u bë pjesë e Hertës, Haching dhe Regensbërg. Pas një udhëtimi të mëvonshëm në vendlindjen e tij, Shqipëri, përfundoi karrierën në vitin 2009. AKTUALITETI
Tani Rraklli jeton në Aue, ku është vendosur motra e tij e martuar me ish- futbollistin profesionist, Skerdilaid Curri. "Unë dua që të punoj si trajner. Kam licencën dhe kualifikimin më të lartë të nevojshëm, por problemi në Gjermani është te fakti se ka shumë trajnerë të mirë. Është e vështirë për mua që të gjej një punë", vijon trajneri shqiptar.
KOMBËTARJA E FEMRAVE
Rraklli, në Gjermani, mund të punojë jo vetëm në drejtimin e një skuadre meshkujsh, por edhe për një ekip femrash. Ai është një nga ish-trajnerët e futbollit të femrave dhe i pari trajner i Kombëtares së femrave në Shqipëri. "Unë realisht kërkova në federatë një post trajneri në sektorin e të rinjve për një nga kombëtaret e moshave. Mirëpo, në atë periudhë, ata po kërkonin një trajner për Kombëtaren e femrave dhe më ofruan që ta bëja këtë detyrë", tregon Rraklli, i cili e ushtroi këtë detyrë që nga viti 2011 për pesë vite në ndërtim të skuadrës Kombëtare si dhe në kërkim të elementëve të nevojshëm për këtë përfaqësuese në Europë dhe në SHBA, kudo ku kishte futbollistë me origjinë shqiptare. "Nuk ia dolëm që të kishim rezultate pozitive në përballjet me ekipet e mëdha kombëtare të femrave, por të paktën triumfuam kundër Greqisë në kualifikueset për Botëror."
E ARDHMJA E KOMBËTARES
Sa i përket të ardhmes së kuqezinjve, të cilët ishin pjesë e Europianit "Francë 2016", Rraklli është skeptik. "Kur Brigel u bë trajner i Kombëtares në vitin 2002, gjërat u bënë më mirë. Ai na ndryshoi shumë, na disiplinoi", tregon fillimisht Rraklli për Shqipërinë. Tashmë, futbollistët me origjinë shqiptare kanë dy mundësi zgjedhjeje dhe kjo e bën më të vështirë të ardhmen sipas tij. "Shumë futbollistë shqiptarë me origjinë nga Kosova nuk preferojnë më Shqipërinë, që nga maji i vitit 2016 kur Kosova u pranua në UEFA dhe FIFA. Ata do të na mungojnë shumë. Presioni i konkurrencës brenda në Kombëtaren tonë nuk është më aq i lartë sa më parë". Rrakkli ka në mendjen e tij një karrierë si trajner në Gjermani. "Dua të tregoj se çfarë mund të bëj si trajner", ka përfunduar Rraklli dhe shkrimi i dedikuar për në nga "Bild".