Luftëtari ringjallet në Kamzë, gol “in ekstremis”
Vendos goli i Rrocës, Bregu ndalet në traversë. Plaku s’mjafton
Në fazën e parë, në Gjirokastër, ishte Kamza që shpërtheu në festë me një gol në minutat shtesë nga ku edhe nisi ecurinë pozitive. Dje, Luftëtari i Likës shfaqi të gjithë potencialin e vet me shumë raste për shënim, dominim mbi kundërshtarin dhe, pavarësisht pengesës nga arbitri Alla që i mohon një 11-metërsh, ja del që të marrë tri pikë. Fitore "in ekstremis" për bluzinjtë në fushën e Kamzës që "fusin xixat" në fundin e tabelës së klasifikimit falë Rrocës në minutën e 90+4', me Vllazninë që duket më e pafuqishmja në "vorbullën e rënies".
PJESA E PARË
Kamza e nis me qetësi takimin si për t'ia kaluar presionin kundërshtarëve. Sebino Plaku bën mirë në dy veprime të ngjashme, por tentativa drejt portës është e pasaktë. Miqtë shtojnë ritmin dhe në të 17-ën minutë ka një pretendim për 11- metërsh. Alla është fare pranë, por e konsideron të rregullt ndërhyrjen ndaj Bregut, fillimisht brenda zonës dhe në vijim të aksionit, atë pa top të Kuqit ndaj Rrocës. Ritmi është i kënaqshëm me Luftëtarin që duket më kërkues. Bluzinjtë rrezikojnë me Bregun, por traversa i mohon golin vlonjatit. Rreziku shkon menjëherë në portën tjetër kur Kamza provon me Rezin në të 26-ën, i cili del përballë portierit mik që pret dhe devijon në këndore. Në të 32-ën dhe 33-ën janë sërish miqtë që provojnë të gjejnë golin. Fillimisht, Bregu me aksion personal dhe goditje e më pas Halilaj ndal Abazajn që vijohet me Rrocën, i cili pretendon sërish përballë Kuqit në zonë. Shumë grintë pa gola në 45 minutat e para.
PJESA E DYTË
Vendësit e kanë të qartë rrezikun që i kanoset nga vija e parë e sulmit të Luftëtarit dhe tregojnë kujdes në prapavijë. Por, në të 50-ën shfaqet sërish i njëjti Bregu. Talenti vlonjat driblon katër lojtarë si të ishte lojë fëmijësh, por në finalizim është më egoist sesa duhet dhe fati nuk e bën që sfera të pushojë në rrjetë. Luftëtari ka grintën e duhur, ndërsa Kamza kërkon që të jetë cinike. Në të 69-ën, Fukui nga e djathta fton Raçiç në qendër, i cili në mungesë të hapësirave pason për Mumajesin që driblon, por gjuan keq dhe jashtë. Në të 76ën, Bregu driblon katër, del në pozicion ku fare mirë mund të pasonte, por zgjedh të godasë.
Edhe një herë, ngjitur me shtyllën. Kamza mundohet të reagojë me një goditje standarde të Plakut. Luftëtari është dominues, rrezikon me Rrocën dhe më pas me Aleksin, por Halilaj pret dhe shmang rrezikun. Miqtë nuk dorëzohen dhe Bregu në shtesë gjuan
mrekullisht, por i tillë është edhe reagimi i portierit Halilaj. Vendësit ndërpriten në kundërsulm dhe po aq e shpejtë është edhe dalja e Luftëtarit që fiton këndore. Luhet e fundit minutë e shtesës dhe krosimi i Zguros nga këndi gjen Përgjinin që devijon me
kokë para Halilajt dhe më pas Rroca gjuan dhe shënon. Luftëtari në ekstazë, ndërsa Kamza merr mësimin e duhur mbi euforinë. Bluzinjtë fitojnë pas katër javësh dhe japin shkëndija në fund duke "trazuar" edhe një herë kartat e mbijetesës…