Dhuna në Partizani-Tirana, reagon policia
Forcat e rendit sqarojnë përplasjet: Tre të arrestuarit, me sende të forta
Policia e Tiranës ka sqaruar dje, nëpërmjet një komunikate, arrestimet për 3 persona, të cilët janë ndaluar për posedim të sendeve të forta dhe jo vetëm sepse ata kanë kundërshtuar forcat e rendit. Bëhet fjalë për 3 tifozë, që do të ndiqnin ndeshjen e basketbollit Partizani- Tirana, e cila u luajt të shtunën në pallatin e sportit "Asllan Rusi" në kryeqytet. Pas incidenteve, Policia e Shtetit ka lëshuar këtë deklaratë për mediat, duke postuar edhe foto të sendeve të forta që posedonin tifozët e arrestuar. "Specialistët për Hetimin e Krimit në Komisariatin e Policisë Nr 3, bënë arrestimin në flagrancë të shtetasve: B.B, 33 vjeç, banues në Tiranë. A.M, 38 vjeç, banues në Tiranë. A. Xh, 18 vjeç, banues në Tiranë. Arrestimi i këtyre shtetasve u bë pasi: Më datë 09.12.2017, rreth orës 17.30, në rruga 'Dritan Hoxha', para fillimit të ndeshjes së basketbollit, e cila do zhvillohej në pallatin e sportit 'Asllan Rusi', ndërmjet ekipeve Tirana-Partizani. Këta shtetas me disa persona të tjerë ende të paidentifikuar, jashtë ambienteve të Pallatit të Sportit kanë kundërshtuar me dhunë punonjësit e policisë së forcës së Posaçme 'Shqiponjat' dhe shërbimet e tjera të Komisariateve të Policisë Nr 2 dhe 3 duke i goditur me sende të forta, gurë, drurë e shkopinj bejsbolli", thuhet në deklaratën e Policisë së shtetit. Për këtë ndeshje, policia, duke pasur sinjalizime për tifozë të përgatitur me shashka, shishe "Molotov" apo shkopinj bejsbolli nga të dyja kampet, mori masën drastike të lejimit në Pallatin e Sportit vetëm të tifozëve që, përveç biletës së ndeshjes, kishin me vete dhe kartën e identitetit apo pasaporta biometrike me vete. Abdulla Dushku