Akuza e Grevës: Flamurtari-Goga, ndeshje e shitur
Goga Basket ka pësuar dje humbjen e parë sezonale në kampionatin e sivjetshëm. Skuadra durrsake është mundur 70-58 në Vlorë nga Flamurtari, në ndeshjen që mbylli dhe javën e 7-të të Kampionatit Kombëtar në basketboll për femra, për grupin A. Një fitore që kishte shijen e një hakmarrjeje për basketbollistet vlonjate, pas humbjes së fazës së parë, në Durrës 83-81. Por i menjëhershëm ka qenë i kontestueshëm fitorja e Flamurtarit. Ish-gjyqtari Albi Greva, në një postim të tij në rrjetin social "Facebook", ka hedhur akuza të rënda karshi gjykimit dhe trajnerit të skuadrës së Flamurtarit, Viron Toska që njëkohësisht është dhe trajner i ekipit tonë kombëtar të basketbollit për femra. Ai ka bërë akuza për trukime dhe ndeshje të blera nga ana e ekipit vlonjat. Midis të tjerave, ai shkruan: "Isha në Vlorë për të shoqëruar tim atë se kishte dëshirë ta ndiqte ndeshjen Flamurtari-Goga, por u gabova që vajta ta ndjek, pasi e dija që kjo ndeshje ishte e "paguar" për ta fituar Flamurtari. Një fakt që edhe një spektator qoftë edhe vlonjat lehtësisht e kupton këtë. E dinë të gjithë ata/ato që luajnë basketboll, e dinë të gjithë ata/ato që e ndjekin, e di dhe federata që bën sikur nuk sheh. Një shfaqe e neveritshme. Do lutesha shumë që kjo gjë të ishte faji i cilësisë së gjykimit, por jo të lejohej që të drejtën e fitores së merituar t'ia hiqje një skuadre e t'ia jepje një tjetre. Por kjo është edhe më e thellë se kaq. Është një vazhdë e pangopësisë për 11 vite… dhe çfarë… për asgjë…. Çfarë fitojnë kur fitojnë padrejtësisht? Kur të gjithë e dimë se si "gatuhet"? Është një çmenduri. Edhe pse jam kërcënuar që të mos filmoja, më vjen mirë nga kjo lloj frike. A e dinë se kjo federatë paguhet nga taksapaguesit për të paguar gjyqtarët? A mos vallë shpërblimi i tyre dhe vëzhguesve nga ana e federatës nuk është e mjaftueshme për të thënë e shkruar të vërtetën? Është shumë evidente që nuk e duan basketbollin. Siç është evidente që zhdëpen e zhdëpen në çdo takim të përfaqësueses kombëtare dhe asgjë nuk ndodh", përfundon komentin akuzues ish-gjyqtari, Greva. A. Dushku