Ndalon Napolin, Pioli i bën dhuratë Interit

Nëse nuk është krizë, atëherë nuk dimë sesi ta quajmë, sepse kjo javë ka qenë një makth i vërtetë për Napolin dhe më keq se kaq nuk mund të shkonte. Vetëm një pikë në dy ndeshje në kampionat përballë Juves dhe Fiorentinës dje dhe eliminim nga Liga e Kampioneve. Papritur, skuadra e Mauricio Sarrit dhe ajo e Elseid Hysajt ka humbur shkëlqimin e saj, ndoshta edhe si rrjedhojë e dëmtimeve të fundit që kanë kushtëzuar shumë zgjedhjet e të kaltërve, sepse Gulam në mbrojtje dhe Insinje në sulm janë titullarë të padiskutueshëm. Pas humbjes me Juventusin dhe asaj në Holandë me Fejnordin, dje pritej reagimi i fortë në "San Paolo" përballë Fiorentinës, por edhe pse tentojnë në çdo mënyrë, madje edhe duke rrezikuar, në fund skuadra mike arrin që të dalë pa plagë nga kjo transfertë, duke u treguar e padepërtueshme në mbrojtje. Fiorentina e Stefano Piolit, e cila sivjet e nisi sezonin me një skepticizmi shumë të madh, duke parë shitjet e rëndësishme që bëri në verë, po konfirmohet një surprizë e madhe, sepse të frenosh Napolin në "San Paolo" është diçka madhështore, duke parë se këtë kishin arritur ta bënin vetëm Interi (barazim 0-0) dhe Juventusi (fitore 1-0). Dhe duke mbetur tek Interi, pikërisht Stefano Pioli i bën një dhuratë të madhe ish-skuadrës së tij, sepse duke e detyruar

Napolin në barazim, ata i lejojnë zikaltërve që të ruajnë kreun, ndërsa ekipi i Elseid Hysajt (titullar dhe 90 minuta në fushë) mbetet i dyti.

NGEC EDHE ROMA - Dita e djeshme e ndeshjeve nisi me sfidën Kievo-Roma, me verdhekuqtë që duke pasur edhe një ndeshje për të rikuperuar, logjikisht me gjashtë pikë në dy sfida, ishin në krye së bashku me Interin. Por dje ishte dita e çmendur e portierit Sorrentino, i cili vendos që të vishte në rolin e superheroit dhe largon me duar e me këmbë çdo tentivë të verdhëkuqve për gol dhe meriton me të drejtë rolin e njeriut të ndeshjes, në barazimin 0-0.