Rikthehet Starova, Partizani “gjyq” publik lojtarëve
Klubi, sondazh me tifozët: A duhen ndryshuar rrënjësisht lojtarët?
Pas humbjes tur përuese, 5- 0, në transfertën e Gjirokastrës, trajneri Sulejman Starova e pa të arsyeshme të japë dorëheqjen, pasi për njëmijenjë arsye ishte një rezultat i papranueshëm për fanellën e kuqe. Por dorëheqja ka zgjatur vetëm një ditë, pasi dje klubi ka dalë me një vendim duke mos e pranuar ikjen e Starovës dhe i ka dhënë votëbesim për të vijuar punën me ekipin. Mësohet se ka qenë insistimi i Drejtorit të Përgjithshëm, Olsi Rama, që "Bobi" të vijojë punën, pasi edhe kur zëvendësoi Iulianon, ndaj tij nuk kishte asnjë objektiv konkret nga drejtuesit. Kur mori drejtimin e ekipit në 7 nëntor, Starovës i është kërkuar thjesht ndryshimi i kurbës së rezultateve, dhe të kapte çfarë të mundte. Gjithsesi, Starova për shumë arsye ka pasur të drejtën e Zotit për të marrë atë vendim pas humbjes 5-0 në Gjirokastër. Përveç rezultatit poshtërues, Starova mbase ka menduar të hapë krahun dhe të marrë përgjegjësitë nëse është ai e keqja e skuadrës, si dhe të mos vërë në pozitë drejtuesit, të cilët nëse e shikonin të arsyeshme të gjenin një alternativë të re. Ndërkohë, në një reagim për "Top-Channel", Starova u shpreh: "Vlerësoj besimin e presidentit Demi që nuk e pranoi dorëheqjen time. Duke i kërkuar falje tifozërisë së Partizanit për dështimin në Gjirokastër, premtoj përkushtim për të bërë më të mirën për skuadrën e zemrës. Pak durim".
MBLEDHJA- Ndonëse u tha pas ndeshjes se drejtuesit e kishin pranuar dorëheqjen e Starovës, ku u lajmërua edhe Klevis Dalipi të niste punën gjatë ditës së djeshme, klubi nuk publikoi asgjë në lidhje me situatën. Me sa duket, drejtuesit kishin menduar që fjalën e tyre të mos e thoshin në të nxehtin e humbjes së hidhur, por pasi të qetësoheshin gjakrat, të analizohej situata. Dje është zhvilluar një mbledhje mes drejtuesve më të lartë të klubit, lojtarëve dhe stafit për të diskutuar për hatanë që u ndodhi në Gjirokastër. Në përfundim nuk është marrë asnjë masë nga drejtuesit e pranishëm, jo vetëm për lojtarët, por edhe për stafin ku është konfirmuar trajneri Starova. Mësohet se lojtarëve u është kërkuar angazhim maksimal dhe të marrin maksimumin në ndeshjet në vijim.