Alarmi, Manxukiç përfundon me 13 të qepura
Kuadrado dhe Kielini japin shpresë, Bufon sërish në dilemë
Ado të mjaftojnë 13 qepje për të ndalur Mario Manxukiçin? "Luftëtari" kroat ka pësuar një dëmtim të rëndë dhe ka përhapur panik në kampin bardhezi. Masimiliano Alegri rrezikon të humbasë një element shumë të rëndësishëm të skuadrës së tij në vigjilje të ndeshjes së madhe kundër Romës, e cila do të luhet të shtunën në mbrëmje në Torino. Dëmtimi që mori kundër Bolonjës në pulpë, ka rezultuar më i rëndë se sa dukej në fillim dhe Mario Manxukiç ka 13 qepje në këmbën e tij. Sulmuesi kroat nuk është stërvitur ditën e djeshme dhe është e sigurt që ka humbur ndeshjen e nesërme kundër Xhenoas, e vlefshme për Kupën e Italisë. Në kampin bardhezi shpresojnë që Manxukiç t'ia dalë të rikuperohet për duelin e rëndësishëm në kampionat kundër Romës. Në rast se ai nuk do të rikuperohet në kohë, atëherë Alegri duhet t'i besojë patjetër sulmuesit Paulo Dibala në skemën 4-3-2-1, ku bashkë me Duglas Kostën do të jetë në mbështetje të Higuainit. Por, duke njohur karakterin e lojtarit dhe faktin që ai nuk dorëzohet asnjëherë, Alegri do të flejë i qetë gjatë këtyre ditëve me shpresën që Manxukiç nuk do ta tradhtojë dhe do të jetë i gatshëm për të sfiduar verdhekuqtë.
STËRVITJA- Ditën e djeshme në Vinovo, lojtarët që ishin titullarë me Bolonjën patën një seancë stërvitore të lehtë në palestër, ndërsa pjesa tjetër e grupit u impenjua maksimalisht në prag të ndeshjes me Xhenoan. Alegri mori lajme të mira vetëm nga Lihshtajner, i cili është rikthyer me grupin dhe kreu stërvitje të plotë. Ende e paqartë situata për të tjerët si Kielini, Kuadrado dhe Bufon. Për dy lojtarët e parë ka optimizëm
dhe shpresa që mund të rikthehen për ndeshjen me Romën, ndërsa portieri Bufon vazhdon të mbetet në dyshim. Megjithatë, Alegri tani e ka luksin të zgjedhë dhe nuk do t'i ndiejë mungesat e dy lojtarëve si Kielini apo Kuadrado.
DIBALA- Nuk ka asgjë zyrtare,
por mediat pranë Juventusit bëjnë me dije se Paulo Dibala mund të rikthehet titullar për ndeshjen e nesërme në Kupën e Italisë kundër Xhenoas. Trajneri Alegri do të aktivizojë lojtarët që nuk kanë pasur shumë minuta deri tani, por duke ruajtur një ekuilibër sepse kupa është objektiv kryesor për bardhezinjtë dhe duan që ta mbyllin ndeshjen brenda 90 minutave. Argjentinasi ka shansin e artë që të udhëheqë ekipin dhe t'i japë sinjale pozitive trajnerit Alegri përpara ndeshjes me Romën në kampionat.