Kinezët, kusht Spaletit për Champions-in
Ndërlikime në merkato, mund të ketë një sforco
Humbja e parë (dhe e vetme) rrezikon të hedhë poshtë siguritë e Interit. Rënia nga kreu në vendin e tretë rrezikon të hapë skenarë jo të kënaqshëm dhe rikthimi në merkato nuk shihet si më i pëlqyeri, për tri arsye: përreth nuk ka profile të dobishme për skuadrën zikaltër, në janar çmimet janë shumë të larta krahasuar me verën dhe, faktori më me peshë, "Suning" nuk është i vendosur për të investuar.
BILANCI - "Suning", mes blerjeve për skuadrën e parë dhe talenteve me perspektivë, ka investuar më shumë se 90 milionë, përfshi bonuset. Për këtë arsye, brenda 30 qershorit 2018, Interi do duhet të arkëtojë rreth 60 milionë për të mbyllur bilancin 2017-'18 në pozitiv (pa borxhe) për të evituar sanksionimet e UEFA-s. Shitja e disa "big"-ëve (Brozoviç e Zhoao Mario do garantonin një plusvalencë të rëndësishme) dhe të disa të rinjve, përfaqëson rrugën më të thjeshtë, por "Suning" po punon edhe mbi disa marrëveshje të rëndësishme me sponsorë dhe mund të paraprijë një pjesë të parave të kualifikimit në Ligën e Kampionëve.
OBJEKTIVI - Rikthimi në Champions mbetet objektivi kryesor, çka Stiven Zhang (i cili do qëndrojë në Milano pranë skuadrës për Krishtlindje) i ka përsëritur Spaletit. "Suning" nuk i kërkon
teknikut fitoren e titullit, por mbylljen e sezonit mes katër vendeve të para. Dhe njëkohësisht trajnerit i është premtuar që në janar, pavarësisht dëshirës për të mos përkeqësuar llogaritë, do ketë një sforco për përforcimin e skuadrës, ndoshta me një tratativë në "stilin Galjardini": huazim dyvjeçar me pagesën e shtyrë në qershor 2018.
LIMITET - "Suning" është
pa dyshim një kolos, me një fuqi ekonomike të jashtëzakonshme, por limitet e vendosura nga qeveria kineze vështirësojnë daljen e kapitaleve nga Kina. Edhe për këtë arsye u arrit marrëveshja (interesi prej 4,8% është prova që merkato ka besim te ndërmarrja aziatike) prej 300 milionësh, për të mbyllur borxhin me "Goldman Sachs" me interes të lartë e për t'i garantuar fonde klubit.