Kukësi, sytë nga Vlora për Alveshin
Prapaskena/ Duro uli në stol Jakovljeviçin pasi është nuhatur një akord me verilindorët
Sulmuesi brazilian i Flamurtarit, Danilo Alvesh, është në fokusin e shumë skuadrave të Kategorisë Superiore dhe së fundmi kampionët e Kukësit kanë shfaqur interes për të marrë shërbimet e tij në merkaton e janarit. Por, deri më tani nuk ka mbërritur një ofertë konkrete në drejtim të Klubit të Futbollit Flamurtari. Kontrata e brazilianit me klubin vlonjat përfundon në fund të sezonit, pra, në verën e vitit 2018, por marrëdhëniet mund të shkëputen në muajin janar. Firmosja së fundmi me dy sulmues, të cilët do të jenë në janar gati për Flamurtarin, serbi Igor Nedeljkovic dhe shqiptari nga Maqedonia, Muarem Muarem, zbehin ndjeshëm pozitat e sulmuesit Alvesh, i cili mund të përfundojë edhe në stol. Por lojtari duket se nuk është plotësisht në planet e trajnerit Duro, i cili kërkon më shumë nga ky lojtar. Në këto kushte, shitja e Alveshit në muajin janar duket se është më e mundshme. Kjo ka sjellë edhe lëvizjen e klubeve. Kukësi duket se në
ditët në vazhdim do të ketë një kontakt me drejtues të klubit vlonjat për të gjetur një marrëveshje për futbollistin. Por në fakt, kampionët nuk janë të vetmit që interesohen për sulmuesin. Braziliani pëlqehet edhe nga Skënderbeu. Por, se kush do ta fitojë garën deri në fund, është administratori Idrizi që do ta vendosë në bazë të ofertës që do të kenë klubet për të marrë shërbimet e Alveshit në pjesën e mbetur të sezonit.
Çështja "Jakovljeviç" - E ndërsa për Danilo Alveshin Kukësi mund ta ketë të vështirë për t'ia marrë Flamurtarit, për mbrojtësin Ivan Jakovljevic e ka më të lehtë. Mbrojtësit i përfundon kontrata me klubin vlonjat në janar dhe të gjitha gjasat janë që ai të largohet nga Flamurtari. "Panorama Sport" mëson nga burime të sigurta pranë klubit vlonjat se pikërisht marrëveshja me Kukësin po penalizon mbrojtësin. Në klub dyshojnë se Jakovljeviç mund ta ketë arritur marrëveshjen në
parim me verilindorët që disa muaj më parë. Kjo gjë duket se është "nuhatur" nga drejtuesit vlonjat dhe trajneri Duro e ka ulur në stol lojtarin. Ivan Jakovljeviç është në një formë shumë të mirë dhe nuk është as i dëmtuar që mund të qëndrojë në stol, por me shumë mundësi gjithçka lidhet me
Kukësin, ashtu sikundër thonë burime pranë klubit. Po ashtu drejt largimit në janar është edhe Haxhi Neziraj. Ish-mesfushori i Luzernës u bë pjesë e vlonjatëve në janar, kur skuadra drejtohej nga Gentjan Mezani, por me ardhjen e trajnerit Duro, kosovari Neziraj përfundoi në stol.