Golat, Tirana më e frikshme se... Skënderbeu
Golavarazhi +27, kryeqytetasit shërojnë "plagën" e rënies
Në Kategorinë Supe riore dhe në të Parën, dy skuadra po ecin paralelisht në kryesim. Skënderbeu në elitë dhe Tirana në ligën e dytë janë duke dominuar përballë rivaleve respektive. Në bazë edhe të statistikave të golave deri në këtë pikë të sezonit, bardheblutë janë edhe më të frikshëm sesa... korçarët. Pas 15 javësh në Superiore dhe pas 11 të zhvilluara në Kategorinë e Parë, skuadra kryeqytetase ka raport më të mirë me golat sesa edhe vetë skuadra e drejtuar nga Ilir Daja. Duke parë që Skënderbeu ka treguar një nivel superior dukshëm shumë herë më të madh sesa kundërshtarët, atëherë krahasimi me bardheblutë vlen me gjithë diferencat e kategorive. STATISTIKAT Korçarët kanë një golavarazh +18. Pas 15 sfidave të zhvilluara, Skënderbeu numëron 10 fitore, katër barazime dhe vetëm një humbje të pësuar në Laç. Sa u përket golave, kryesuesit e Superiores kanë shënuar 28 dhe kanë pësuar vetëm 10. Në ndjekje të korçarëve, në bazë të golave të
shënuar, është Kukësi me 25 të shënuar, ndërkohë që skuadrat e tjera të Superiores janë nën kuotën e 20 golave. Në lidhje me pësimet, në ndjekje të korçarëve është Flamurtari me numër të njëjtë, 10 gola. Në Kategorinë e Parë, Tirana ka arritur të superojë këto shifra.
Pas goleadës së realizuar në fundjavë ndaj Pogradecit, bardheblutë kanë arritur në kuotën e 29 golave të shënuar. Pas 11 javëve të luajtura në të Parën, kryeqytetasit kanë pësuar vetëm dy gola: Një në humbjen minimale ndaj Bylisit dhe një në barazimin 1-1
me Shënkollin. Golavarazhi i përgjithshëm i bardhebluve të Ze Marias në kampionat është +27. GOLASHËNUESIT
Një nga shkaqet e rënies së Tiranës në Kategorinë e Partë ishte fakti që nuk shënonte dot gol, pavarësisht
mënyrës së lojës apo edhe kur krijonte volum. Mirëpo, në këtë vit, bardheblutë jo vetëm që kanë një si Sentamu në kuotën e nëntë golave në kampionat apo të kapitenit Karabeci me pesë të tillë, por gjen autorësi golash të bardhebluve edhe te mesfushorët
Daja, Maveje e Çelhaka apo edhe te mbrojtja me autorë golash si Hoxhallari, Turtulli e Doka. Gjetja e golit edhe nga Halili e Ngoo bën që kryeqytetasit ta kenë zgjidhur këtë ngërç të viteve të fundit, por sidomos të edicionit të vjetshëm. "HAT-TRICK"
Në ndeshjen e fundit, Sentamu mori topin pas tre golave, ndërkohë që me fanellën bardheblu diçka e tillë nuk ndodhte prej 21 muajsh. Elis Bakaj ka shënuar për herë të fundit tri herë me kryeqytetasit më 3 prill 2016 duke mposhtur i vetëm Tërbunin.