Momenti i Apolonisë, Kashami: Ja si e kaluam traumën
Fierakët morën të shtunën fitoren e tretë radhazi
Apolonia po përjeton momentet e saj më të mira gjatë këtij kampionati. 9 pikë të plota në 3 ndeshjet e fundit, 7 gola të shënuar dhe vetëm 1 i pësuar, janë tregues të qartë të ritmit fierak. Fierakët kanë kaluar nga një kah në tjetrin: pas dy humbjeve të njëpasnjëshme (2-3 me Tomorin, 0- 2 me Tiranën), skuadra merr tri fitore: 3-1 me Bylisin, 2-0 me Shënkollin dhe Ilirinë. Brenda grupit ka harmoni të plotë dhe funksionim, ekipi ka progres të ndjeshëm, por po aq ekziston dhe droja nga ndonjë eufori e panevojshme dhe dëmtuese për vetë Apoloninë. Dhe ai që mendon më
shumë për ta mbajtur skuadrën "në tokë" është trajneri Kashami, i cili, në aspektin individual, e ka fitoren e katërt radhazi, pasi dy humbjet me Tomorin e Tiranën qe i dënuar dhe skuadra u drejtua nga zëvendësit e tij. KASHAMI
"Jemi në një moment qetësie
dhe ekipi e ka thënë në fushë fjalën e vet, - shprehet Kashami. - Pa dyshim që jam i kënaqur me rezultatet e ndeshjeve të fundit, ndërsa për lojën kemi ende elemente që duhet t'i përmirësojmë. Nëse dikush e sheh si befasues këtë hap cilësor të Apolonisë, unë nuk e gjykoj si të tillë, pasi gjithçka është rrjedhojë logjike e përgatitjeve serioze, e përkushtimit dhe motivimit maksimal të lojtarëve, por edhe njëfarë pjekurie që po fiton grupi, pasi faza e njohjes dhe përshtatshmërisë quhet e ezauruar tanimë. Thënë ndryshe, ne që jemi më brenda skuadrës dhe që e dimë mirë se çfarë bëhet, e vlerësojmë si ecuri normale dhe të meritueshme këtë stad, pasi gjithë skuadra ka punuar fort dhe ka qenë e predispozuar në detyrat e veta". Përtej faktit, por edhe vlerësimit gjakftohtë, merakun e tij Kashami e ka tek ajo që vjen pas, te pjesa tjetër e kampionatit. Trajneri i Apolonisë dëshiron që skuadra ta ruajë këtë ritëm. "Ajo që kemi bërë, është shumë e rëndësishme, pasi, duke studiuar të shkuarën, korrigjohemi, përmirësojmë dhe ndërtojmë të ardhmen. Dhe kjo është hallka që duhet t'i mëshojmë fort e të tregohemi të kujdesshëm. Gara është ende shumë e gjatë dhe do vështirësohet edhe më tepër me kalimin e javëve. Ne nuk e kemi luksin e vetëkënaqësisë dhe adrenalinës, pasi do të ishte e dëmshme. Kësaj duhet t'i trembemi të gjithë, sepse futbolli është sport i çudirave dhe shpesh i alogjikës", përfundoi Kashami. Bujar Rama