Besa nis merkaton, kërkon Mirakën për portën
Bisedime me ish-gardianin e Luftëtarit, priten ndryshime
Me një ekip të rindërtuar nga e para, me lojtarë cilësorë dhe një ëndërr për rikthimin në Superiore, Besa e nisi kampionatin me një synim të qartë. Por, javë pas jave, rezultatet tregonin të kundërtën. Për të mbërritur deri në pikët ku skuadra pësoi të shtunën humbjen e pestë në gjashtë ndeshjet e fundit. Praktikisht, kavajasit janë jashtë luftës për në Superiore. Por, ai që mban peshën kryesore të fajit në disfatën e thellë të së shtunës ndaj Besëlidhjes, është portieri 17-vjeçar Ariol Kaloshi. Ai bëri gabime amatore te tre golat e parë, aq sa e detyroi trajnerin Bledar Sinella që ta nxirrte nga loja.
KRIZA
Ekipi, më shumë sesa meritë e kundërshtarëve, nisi që me gabimet amatoreske t'ua dhuronte vetë fitoret ekipeve kundërshtare. Kështu ndodhi në Lezhë me Besëlidhjen, në Shkodër me Vllazninë B, për të vijuar në Tiranë me Dinamon e së fundi me Besëlidhjen në Kavajë. Nëse shihen golat e pësuar nga verdhezinjtë, ata nuk rrjedhin nga aksione të
miqve, por pasime gabim e dhurata nga lojtarët verdhezinj. Kështu ndodhi edhe me Besëlidhjen javën e shkuar. Lezhjanët shkuan në portë katër herë dhe shënuan po kaq gola. Në video duket qartë se golat janë pësuar nga gabimet foshnjarake të mbrojtjes
dhe portierit Kaloshi. Nga ana tjetër, trajneri Bledar Sinella ka bërë të ditur se disponon video të dy penalltive tejet flagrante të mohuara nga gjyqtari.
MERKATO
Në këtë situatë, Besa është duke menduar që tani për merkaton e janarit. Sipas të gjitha gjasave, gardiani Ariol Kaloshi nuk do të jetë më pjesë e skuadrës në pjesën e dytë të sezonit. Dhe "gardiani", që drejtuesit kanë pikasur për të zëvendësuar Kaloshin, është ish-portieri i Luftëtarit, Festim Miraka. Ky i fundit u largua nga bluzinjtë në javët e para të kampionatit pas një gafe që bëri në sfidën me Kamzën. Bëhet e ditur se drejtuesit e skuadrës kanë nisur bisedimet me portierin për ta afruar në merkaton e janarit. Përveç tij, pritet që në vazhdim të ketë negociata për të afruar futbollistë të tjerë.