Konte ngre zërin: Meritoj më shumë respekt!
"Të frenojmë Sitin në merkato, përndryshe pushtojnë Europën"
Antonio Konte nuk është dakord dhe replikon me mediat për zërat në lidhje me të ardhmen e tij në stolin e Çelsit (i fundit flet për një zëvendësim të tij nga Karlo Ançeloti që në shkurt). "Çdo ditë ka zëra për të ardhmen time, por nuk është e drejtë, sepse mendoj që meritoj pak më shumë respekt për shkak të asaj që kam bërë sezonin e shkuar dhe për atë që po bëj tani", nënvizoi trajneri i Çelsit. Italiani është i irrituar prej këtyre spekulimeve jo për fatin e tij, por për atë të skuadrës: "Të lexosh çdo javë që klubi ka kontaktuar për sezonin e ardhshëm këtë apo atë trajner, për mua nuk është një problem, por mund të jetë për futbollistët, të cilët mund të shpërqendrohen. Unë kam edhe një vit kontratë dhe, në këtë moment, mendoj vetëm për të përmirësuar lojtarët dhe skuadrën time". Ai bën dhe një koment për situatën aktuale të klubit, i cili renditet në vend të tretë në kampionat dhe shanset për të mbrojtur titullin këtë sezon i kanë minimale: "Nëse merrni pak vesh nga futbolli, ky është momenti në të cilin duhet treguar durim dhe të pranosh faktin që dikush po punon mirë. Sezonin e shkuar bëmë një punë fantastike dhe po e çojmë përpara edhe këtë vit, duke ulur moshën mesatare të skuadrës. Për një klub si Çelsi është shumë e rëndësishme
që të mund të krijohet një bazë e re për të ardhmen dhe të përballemi me të me optimizëm". Por Konte nuk e kursen një shigjetë në drejtim të skuadrës së Guardiolës: "Unë mendoj se, kur ke mundësinë për të shpenzuar shumë para në merkato, është e drejtë që ta bësh. Duhet të jesh shumë i
zoti që t'i shpenzosh paratë në këtë mënyrë. Duhet të jesh inteligjent për të kuptuar pozicionet, rolet që duhen përmirësuar". Ish- trajneri i Juventusit e ka edhe një strategji në merkaton e janarit: të ndjekë në mënyrë agresive bashkë me ekipet e tjera talentet e reja, të cilat mund të përfundojnë te Siti: "Çdo
skuadër, çdo klub duhet t'u kushtojë shumë vëmendje në merkato. Sepse nëse një klub si Siti i merr të gjithë lojtarët më të mirë, do të jetë shumë e vështirë për ne që të luftojmë kundër tyre jo vetëm në Angli, por edhe në Europë. Por nëse ata kanë mundësi t'i rrëmbejnë, atëherë është e drejtë e tyre ta bëjnë".