Siti “lan në ar” Pep Guardiolën
Rroga e re 20 milionë paund çimenton statusin e trajnerit më të paguar në botë
Mançester Siti do t'i ofrojë Pep Guardiolës një kontratë të re 4- vjeçare në verë dhe janë optimistë se trajneri katalanas do të ndërtojë një dinasti në "Etihad" duke qëndruar për një dekadë. "Qytetarët" regjistruan fitoren e 16- të radhazi në Premier Ligë, pasi mundën Totenhemin 4- 1 të shtunën dhe tani i kanë mundur të gjithë rivalët për titull me lehtësinë më të madhe. Mediat angleze raportojnë se sheikët nga Abu Dhabi janë shumë të kënaqur nga puna e trajnerit të tyre dhe duan t'i ofrojnë atij një kontratë të përmirësuar në fund të këtij
sezoni, pavarësisht se asaj do t'i kenë mbetur edhe 12 muaj atëherë. Ata mendojnë se kanë gjetur një trajner unik si Junajtid me Fergusonin dhe nuk duan ta humbasin, duke i rritur me disa milionë të tjera edhe rrogën të cilën Pep përfiton aktualisht në Mançester ( 15 milionë paund në sezon). Guardiola kaloi 4 vite te Barcelona dhe 3 te Bajerni, por Siti është optimist se me mjedisin që i ka siguruar 46- vjeçarit, do ta bindin për të qëndruar shumë më gjatë në "Etihad". Ata mendojnë se është faji i drejtuesve të Barcelonës që e detyruan trajnerin që të merrte një viti pushim në 2012. Në fakt, Guardiola e ka pranuar edhe vetë se në Mançester ndihet shumë mirë dhe i pëlqen gjithçka ka gjetur në këtë klub, të cilin nuk rresht së falënderuari për mbështetjen pas vitit të parë në të cilin dështoi të fitonte. Teknikut i është lejuar që të afrojë stafin e tij të besuar në klub, jo vetëm atë teknik. Por atij i është plotësuar çdo dëshirë që ka pasur në merkaton e verës. Dhe ai e ka nënvizuar gjithnjë këtë, madje e bëri edhe pas fitores ndaj Totenhemit, kur falënderoi drejtuesit që i kishin transferuar këtë grup të shkëlqyer lojtarësh. SHIFRAT
80 milionë paund është paketa financiare që sheiku Mansur do t'i vendosë në dispozicion trajnerit për të rinovuar edhe për katër vite të tjera në "Etihad". Çka do të thotë se katalanasi do të sigurojë një rrogë prej 20 milionë paundësh në vit ( 400 mijë paund në javë), 5 milionë më shumë nga kontrata aktuale, duke çimentuar statusin e trajnerit më të paguar në botën e futbollit, të cilin e mban edhe aktualisht.