Dibala gati, Alegri do ndryshojë skemën
Argjentinasi dhe mungesat në mesfushë imponojnë ndryshime, Markizio ngroh motorët
Dëmtimi i Matudit bëhet më i lehtë për t'u pranuar kur nga e njëjta infermieri vijnë lajmë të mira në lidhje me shëndetin e Dibalës. Sipas burimeve nga brenda klubit bardhezi, argjentinasi ka intensifikuar punën në stërvitje duke dhënë sinjale shpresëdhënëse në lidhje me praninë e tij në sfidën e ardhshme ndaj Totenhemit. Parulla në këto raste është "Kujdes", por dëshira e "La Joya"-s dhe puna e stafit bardhezi mund t'u dhurojë tifozëve një rikthim më të shpejtë se sa ai i hipotetizuar në fillim. Me Higuainin në superformë pas tripletës së parë ndaj Sasuolos, Alegri merr sinjale inkurajuese nga vija e parë e sulmit.
E RËNDË - Ajo që e shqetëson teknikun është gjendja e Matudit. Francezi ka një dëmtim në kofshë dhe optimizmi në "Vinovo" nuk shënon pikun. Mesfushori rrezikon seriozisht, jo vetëm Fiorentinën në fundjavë, por edhe sfidën e Ligës së Kampioneve dhe derbin ndaj Torinos.
Humbja e ish-lojtarit të PSG-së rëndon po aq sa do të rëndonte ajo e Dibalës. Nëse Paulo siguron klas, cilësi dhe gola, Matuidi është nga ata që për karakteristika duket i pazëvendësueshëm në skemat bardhezi, pasi puna e tij lehtëson detyrat mbrojtëse të
Pjaniçit dhe Khedirës. Saraçineska e Juventusit ka pësuar vetëm një gol në pesëmbëdhjetë takime dhe një pjesë e mirë e meritës i takon filtrit francez.
TRE - Duke pasur parasysh faktin që Alegri një zëvendës-Blez nuk e ka, zgjidhjet
bien mbi pjesëtarë të tjerë të organikën. I pari që mund ta zëvendësojë mund të jetë Klaudio Markizio. Mesfushori ka përvojën e mjaftueshme për t'i bërë ballë delikatesës së rolit. Ajo që vë në dyshim aktivizimin e mesfushorit është forma fizike, sidomos në ndeshje "Champions"- i, ku shpenzimet energjetike janë vërtet shumë.
Ky dyshim bën që në lojë, në kuptimin teorik të fjalës, të hyjë Stefano Sturaro, maratonomaku që tashmë është i plotësuar edhe në nivel përvoje ndërkombëtare. Alternative e tretë, por jo domosdoshmërisht më e pamundura, është Kvadu Azamoah, mëngjarash si Matuidi dhe me cilësi të larta atletike. Disi më i vështirë aktivizimi i Betankurit, i cili, në mozaikun bardhezi, është më shumë një zëvendës i Miralem Pjaniçit.
SKEMA - Të gjitha këto dilema mund të gjejnë zgjidhje te moduli që mund të jetë 4-2-3-1. Në këtë modul mund të ketë hapësirë për Bernardeskin dhe për një pykë të vetme ( Higuain) nëse Dibala nuk jep garancitë e nevojshme. Me Kuadradon jashtë dhe Diego Kostën në dyshim, mesfusha me dy është diçka më shumë se ide, megjithatë ditët në vijim, sidomos infermieria, do të hedhin më shumë dritë mbi misteret që janë në kokën e Alegrit.