Hejnkes: Dua finalen, Bajerni nuk e fal kupën
Kapiteni kërkon shpjegime, braziliani përgjigjet në... heshtje
‘‘ Kështu nuk është aspak mirë. Po fitojmë 2-1, ka një top 50-50 dhe askush nuk e fut këmbën. Marselo, je shumë statik?". Kjo është shfryrja e Serxho Ramosit kundër shokut të skuadrës, e filmuar nga kamerat e televizionit spanjoll "Movistar" pas barazimit në minutën e 89-të. Levante arriti të barazonte rezultatin kundër Realit të Madridit në fund falë një goli të Xhampaolo Pacinit. Fjalët e kapitenit të Zidanit dëshmojnë se cila është gjendja shpirtërore e kampionëve të Europës pas ndalesës së radhës në La Liga, e cila i lë madrilenët 19 pikë pas Barcelonës kryesuese. Mbrojtësi përpiqet që ta mbajë skuadrën të bashkuar, që të paktën të luftojë për të vetmin kompeticion që i ka mbetur, Liga e Kampioneve: "Duhet të qëndrojmë të bashkuar për të siguruar një vend në Champions. Nuk mund të pësojmë gol në minutat e fundit. Jemi futbollistë ekspertë dhe duhet të dimë si t'i menaxhojmë këto situata. Në Champions, çdo gabim është fatal. Nuk duhet të gjejmë fajtorë, sepse jemi të gjithë, futbollistët dhe trajneri. Tani duhet të
flasim më pak dhe të shfrytëzojmë kampionatin për t'u stërvitur që të bëjmë një rrugë të suksesshme në Ligën e Kampioneve, që është kompeticioni ku ne shkëlqejmë. Por, për të bërë rrugë në Europë, duhet të kalojmë PSG-në dhe të rikthehemi të luajmë mirë në La Liga".
Kamerave nuk u shpëton asgjë, por Marselo respektoi gradat dhe nuk replikoi ndaj kapitenit, ndërkohë që Reali regjistronte të gjashtin barazim sezonal. Ndaj Levantes, madrilenët humbën njëkohësisht dy pikë që mund të kishin rezultuar tejet të çmuara në ekonominë e
një kampionati që vërtet mund t'i ketë nxjerrë jashtë luftës për titull, por jo prej asaj për një vend në Ligën e Kampioneve. Me vetëm një trofe në lojë, "Los Blancos" janë tashmë të detyruar t'i investojnë të gjitha energjitë në "Champions", ku shorti i ka vënë përballë PSG-së.