Fino: Mediat europiane fundosin Dukën, trukimi nis nga FSHF

Bashkim Fino, nëpërmjet një reagimi në rrjetin social "Facebook", ka botuar një shkrim të një media europiane, ku ish-zëdhënësi i komisionerit europian për të drejtat e njeriut, Gregory Mathy, flet për bilancin e Armand Dukës në krye të FSHF-së. Më poshtë, edhe statusi i Finos. "Në prag të zgjedhjeve që do të përcaktojnë se cili do të jetë presidenti i Federatës Shqiptare të Futbollit gjatë katër viteve të ardhshme, mediat europiane godasin rëndë Armando Dukën, njeriun që sipas tyre është përgjegjës për ' korrupsionin dhe trukimet e përhapura' në kampionatin shqiptar. Ditën e djeshme, ish-zëdhënësi i komisionerit europian për të drejtat e njeriut, Gregory Mathy, aktualisht drejtuesi i një fondacioni sportiv, foli mbi zgjedhjet e FSHF-së në ' Completment Foot', një ' talk shoë' radiofonik i kanalit belg RTBF. I pyetur për bilancin e Dukës në krye të FSHF-së, Mathy u shpreh se: 'Federata në atë vend nuk shihet si një institucion i pavarur, por dyshohet që edhe ajo ka futur duart në këto fiksime ndeshjesh. Kjo ka bërë që Superliga shqiptare të shihet si një prej kompeticioneve më të korruptuara në botë, për të mos thënë më i korruptuari. Ka pasur ndeshje çdo javë që ngre dyshime'. Jo vetëm kaq, por Mathy hodhi hije dyshimi mbi trukime edhe për ndeshje të Kombëtares së futbollit. ' Kombëtarja e Shqipërisë ka bërë hapa të mëdhenj, e mbani mend që u kualifikua në Europian, por duhet thënë se mënyra sesi fituan ndeshjen vendimtare 3-0 në Armeni gjithashtu ngriti dyshime. Disa drejtues armenë akuzuan disa lojtarë të Kombëtares së tyre si tradhtarë të kombit. Kjo bën të kuptohet atmosfera që u krijua", shtoi Mathy. Ish-zyrtari i lartë i Komisionit Europian, gjithashtu dënoi transparencën me të cilën po zhvillohen këto zgjedhje. 'Zoti Duka, në mënyrë të papritur ka shtuar 12 votues të rinj. Shumë nuk janë ende të qartë për kredencialet e këtyre votuesve. Nuk ka shumë rëndësi emri i atyre që do të votojnë, por është njësoj sikur një ditë përpara zgjedhjeve, ju të dy të shihni emrin tuaj në listë për të votuar për Presidentin e Federatës Belge. Duka ka gjithandej miq që mund ta ndihmojnë për të fituar mandatin dhe kjo shihet si një përpjekje për të garantuar këtë gjë', tha Mathys", shkruhej në statusin e kandidatit Fino.