Shehi: Meritojmë notën dhjetë
"Reaguam pas humbjes në Gjirokastër. Ndaj Flamurtarit nuk është përcaktuese për titullin"
Fitorja në Shkodër ktheu sërish Skënderbeun në një diferencë + 8 nga vendi i dytë dhe tashmë radhën e ka takimi ndaj Flamurtarit. Skënderbeu u ngrit menjëherë pas "rrëzimit" në Gjirokastër dhe dy fitoret, njëra prej të cilave në Kupë, kanë rikthyer buzëqeshjen në kampin bardhekuq. Për kapitenin Orges Shehi, e rëndësishme është që gabimi i ndeshjes së parë të vitit u la pas dhe i gjithë përqendrimin mbetet te Flamurtari. Në një prononcim për "Panorama Sport", Shehi flet pa dorashka në lidhje me ecurinë e ekipit në gjysmën e parë të sezonit, ndërsa nuk pranon ta quajë ndeshje titulli takimin e kësaj fundjave ndaj vlonjatëve të vendit të dytë.
Shehi, faza e dytë e kampionatit u mbyll. Skënderbeu +8 nga vendi i dytë. A quhet kjo një ecuri pozitive?
Po ta marrësh në përgjithësi, për dy fazat e para që janë mbyllur, mund të them se jemi të kënaqur. Ne kemi bërë një gjysmëkampionati të mirë dhe jemi të kënaqur me atë që kemi dhënë, por edhe me atë që kemi marrë.
Diferenca më vendin e dytë a u krijon komoditet
për të mbajtur larg presionin e kundërshtarit?
Përtej diferencës, unë do të thosha se ne kemi një grup lojtarësh që prej vitesh nuk jemi ndikuar nga presioni. Presioni është gjithmonë i pranishëm në futboll dhe është normale që të kesh presion, pasi kjo të bën mirë dhe të mban në tonus e të karikuar. Ne absolutisht nuk kemi ndierë presion nga kundërshtari, jo tani që jemi 8 pikë përpara, por edhe kur kemi qenë më pak.
Pas humbjes ndaj Luftëtarit duket se keni bërë kthesën për më tepër në Shkodër...
Paraqitjen e dobët në Gjirokastër, të gjithë ne e kemi pranuar. Pas ndeshjes bëmë autokritikë, pasi nuk ishim në ditën tonë më të mirë. Por, ekipi reagoi menjëherë në Kupë, e më pas në kampionat duke u rikthyer në lojën e vet.
Fitoren në Shkodër e bëri më të lehtë shpërqendrimi i kundërshtarit?
Vinim pas një humbjeje në kampionat dhe dëshira për t'u kthyer te fitorja ishte e madhe. Kemi bërë një ndeshje të mirë dhe kjo merr vlera akoma edhe më shumë, pasi arritëm të përmbysnim disavantazhin momental pas golit të pësuar. Hymë në fushë me objektiva të qarta dhe mund të them se arritëm t'i impononim lojën tonë kundërshtarit.
Në momentin kur diferenca me Flamurtarin shkoi 6 pikë, çfarë menduat?
Kurrsesi nuk biem në presion, e thashë edhe më sipër, kjo për shkak të grupit që kemi në përbërje. Kampionati është i tillë, kur humbet ti dhe rivali fiton, ato afrohen. Përfituan nga ndalesa jonë, siç kemi përfituar edhe ne më herët. E rëndësishme është që ne u ringritëm sërish, pas asaj ndeshje, që nuk dhamë atë që duhet të jepnim, çdo gjë u rikthye e njëjtë.
Ndaj Flamurtarit a pritet të jetë një ndeshje që do të vendosë titullin?
Jo, kampionati është i gjatë. Nuk është një ndeshje përcaktuese, por një ndeshje në vazhdimësi të sezonit. Do të luajmë përballë vendit të dytë, një ekip që meriton respekt dhe vlerësim.
Flamurtari është përforcuar pas merkatos së janarit. Sa e njihni kundërshtarin?
Të them të drejtën, nuk është se jam në dijeni të përforcimeve të tyre. Ne jemi një ekip solid dhe, siç e kam thënë shpesh, jemi një skuadër që rival kemi vetëm veten tonë, pa mohuar vlerësimin dhe respektin për kundërshtarin. Përqendrohemi vetëm tek ekipi ynë dhe nuk kemi asnjë lloj ndikimi se çfarë bëjnë ekipet e tjera.
Fakti që keni ruajtur grupin e paprekur do të jetë një plus më shumë?
Besoj se klubi i ka llogaritur mirë transferimet e merkatos. Besoj se nëse ka pasur oferta konkrete, klubi ka bërë vlerësimet e duhura. Duke parë dhe objektivat, mendoj se kemi reaguar mirë.
Çfarë note do t'i vinit Skënderbeut në këto 18 javë kampionat?
Unë këto 18 javë do t'i lidhja edhe me 14 javë në Europë dhe kemi bërë dy kampionate. Skënderbeu për gjithçka ç'ka dhënë në Europë dhe kampionat besoj se meriton notën 10, pasi kemi bërë krenarë të gjithë Shqiptarët, jo vetëm Korçën.
Tashmë që nuk do të luani në Europë, a duhet të presim një ekip më të fortë?
Ne do të jemi të përqendruar vetëm te kampionati dhe Kupa. Europa na ndihmonte shumë dhe këtë e tregoi jo vetëm ky sezon, por edhe ai i mëparshmi. Gjithsesi, duhet të gjejmë motivimin e duhur dhe ta mbyllim më së miri kampionatin.