Akuza dhe vendime të dyshimta, në lojë hyn presioni
Një miks mes dhunës, presioneve, akuzave dhe vendimeve të dyshimta të FSHF-së. Situata në Kategorinë e Parë është pak a shumë e njëjtë me atë të viteve të tjera. Ka shumë pak gjasa që në këtë periudhë, kur mbeten edhe katër javë nga fundi i fazës së dytë që përcakton më pas edhe ndarjen e ekipeve në dy grupe në fazën e tretë, situata të jetë e qetë. Por, këtë herë, duket se zgjedhjet për kreun e Federatës dhe organet e tjera drejtuese që do të zhvillohen nesër, duket se po ndikojnë edhe më shumë dhe gara mund të humbasë disi seriozitetin. Pas shtyrjes së ndeshjes së prapambetur mes Shënkollit dhe Bylisit, që ishte planifikuar të luhej në mesjavën e kaluar, për shkak se lojtarët ballshiotë ishin helmuar, këtë herë është Kastrioti që ka pretendime. Në një kohë që sfida KorabiKastrioti duhej të luhej normalisht të shtunën si të gjitha ndeshjet e tjera, në mënyrë të beftë, ditën e premte, vjen vendimi që takimi të shtyhej për të hënën. Shkak për këtë u bë kërkesa e klubit krutan, pasi një pjesë e futbollistëve të skuadrës ishin të sëmurë me grip. Madje, klubi i Korabit reagoi me ironi në lidhje me këtë çështje duke pretenduar se u lajmëruan me vonesë, në një kohë që kishin mbërritur në Dibër dhe u akomoduan në hotel. Vendim i dyshimtë i FSHFsë. Në ndeshjen e djeshme në Peshkopi, Kastrioti fiton 1-0 me gol të Kabirut. Krutanët thellojnë diferencën në +10 me Egnatian e vendit të dytë dhe janë në rrugën e duhur drejt rikthimit në Superiore. Në këtë ndeshje nuk mungon tensioni dhe ndërhyrjet horror. Rrogozhinasit, që janë rivalët më të afërt të krutanëve, janë mundur në Lezhë nga Besëlidhja. Një sfidë me shumë kontestime dhe përplasje edhe në këtë sfidë, ku vendoset nga goli i serbit Kosta Bajiç, që u jep lezhjanëve 3-pikëshin. Besa është duke përjetuar sezonin e vet më të vështirë. Kavajasit nuk po arrijnë të dalin nga gjendja e vështirë. Të shtunën, verdhezinjtë pësuan humbjen e pestë radhazi në kampionat ku u mundën në fushën e tyre nga Burreli. Besa rrezikon seriozisht rënien, ndërsa matjanët kanë nisur të rikuperojnë pikët që nuk i morën dot në pjesën e parë të kampionatit. Dinamo po bind nga java në javë. Skuadra ka bërë disa ndryshime në merkaton e janarit dhe duket se gjërat po funksionojnë mirë. Blutë fituan në ndeshjen ndaj Vllaznisë B të luajtur në Pezë. Tashmë, skuadra është seriozisht në garë për të kapur 5-shen e parë. Në Pukë luhet vetëm 27 minuta në ndeshjen mes Tërbunit dhe Erzenit, ku shijakasit udhëheqin 2-1. Më pas një ciklon me reshje të dendura shiu dhe erë të fortë e bëjnë të pamundur vazhdimin. Tre lojtarë të Erzenit përfundojnë në spital për shkak të motit. Në Grupin B, Tirana vazhdon të mos njohë rivalë. Bardheblutë fitojnë në transfertën e Cërrikut me rezultatin 2-1. Edhe pse gjendet në disavantazh, Tirana përmbys gjithçka dhe vazhdon të udhëheqë grupin. Në Ballsh ka tension, përplasje dhe akuza për dhunë. Bylisi fiton me vështirësi ndaj Tomorit me një gol të Granados në minutat e fundit. Ndërsa, beratasit akuzojnë se u është dhunuar shoferi i autobusit dhe vendësit kanë ushtruar presion psikologjik ndaj lojtarëve miq dhe gjyqtarit. Apolonia ndalet më në fund pas fitoresh radhazi duke u mundur 2-0 në Peqin nga Shkumbini. Pogradeci surprizohet në fushën e vet nga Iliria, ndërsa Naftëtari gjen fitoren e dytë në kampionat duke shkatërruar Shënkollin 5-2. Besar Bozgo