Isufi tregon kërcënimet: Na flisnin për armë dhe plumba
Enes Isufi është vetëm 17 vjeç dhe luan për Vllazninë B. Një prej lojtarëve të talentuar shkodran, i cili është grumbulluar edhe nga Kombëtarja U-19. Dje ra pre e kërcënimeve nga administratori i Korabit, Fehmi Mëziu. Në një prononcim për gazetën, Isufi tregon gjithçka ndodhi në fushë në sfidën e djeshme. Ai thotë se Mëziu e ka kërcënuar duke i thënë se do t'i fuste plumbin. Sipas tij, kjo është një situatë e papranueshme.
Deklarata - Në një reagim për gazetën "Panorama Sport", Isufi shprehet: "Ne po debatonim mes lojtarësh në fushë kur erdhi edhe administratori Fehmi Mëziu dhe më kërcënoi mua dhe shokët e tjerë se do na fuste plumbin. Na kërcënoi duke në thënë se do na fuste plumbin. Përmendte armë dhe plumba apo gjëra të tilla", tha fillimisht Isufi. I pyetur nëse u frikësuan nga kjo histori, lojtari përgjigjet: "Sigurisht që ne nuk e morëm seriozisht dhe nuk u frikësuam për ato që thoshte, por këto janë të papranueshme. Ne luajmë futboll të pastër dhe mundohemi të japim maksimumin. Por, këto që ndodhin janë të papranueshme. Pas kësaj ndeshjeje më vjen keq vetëm që humbëm dhe për më tepër kur ka ngjarje të tilla. Ne duam të luajmë futboll normalisht, ndërsa këta po na e vështirësojnë. Përtej gjithçkaje, ne do të vazhdojmë të luajmë normalisht në çdo takim dhe do japim maksimumin në fushë për ta mbajtur skuadrën në Kategorinë e Parë", tha Isufi në reagimin e tij për gazetën "Panorama Sport". Ndërkaq, një pjesë e mirë e lojtarëve të skuadrës shkodrane janë të rinj dhe duke parë atë që ndodhi në Dibër, prindërit e tyre kanë në qenë të shqetësuar deri në momentin kur futbollistët kanë mbërritur shtëpitë e tyre.