Klubi i Korabit: Shpifje, askush nuk është kërcënuar
Klubi i Korabit ka reaguar në mbrëmjen e djeshme pas akuzave nga stafi teknik dhe lojtarët e Vllaznisë B për kërcënime gjatë ndeshjes së luajtur dje në Peshkopi. "Duke marrë shkas nga prononcimi i trajnerit Kraja se ai dhe lojtarët e tij janë dhunuar dhe ofenduar, në mënyrë të përsëritur ky person po përbalt emrin e klubit që përfaqëson dibranët me akuza të pabaza dhe shpifje. Lojtarët e Vllaznisë B dhe trajneri i tyre kanë treguar mungesë respekti ndaj tifozëve dibranë dhe klubit Korabi në dy takimet e zhvilluara në Peshkopi dhe Shkodër. Në Peshkopi barazuan 1-1 dhe thyen stolat e pankinës, ndërsa në Shkodër është dashur ndërhyrja e policisë dhe FNSH-së që të qetësohet situata, pasi trajneri është konfliktuar verbalisht në prani të delegatit dhe vëzhguesit me stafin e Korabit. Është e habitshme se pas çdo takimi në transfertë, prononcimet e trajnerit të Vllaznisë B janë të tilla për çdo ekip, me të cilin është ndeshur. Klubi i Korabit, duke publikuar ndeshjen e plotë, do të vërtetojë që takimi është zhvilluar në kushte 'fair-play' dhe tepër korrekte në të gjitha aspektet. Ndërhyrja në fushë është bërë pas ndërprerjes së ndeshjes nga kryesori i takimit, i cili ndëshkoi me karton të kuq Laçon dhe një lojtar të Vllaznisë B. Portieri ynë është ofenduar, pasi gjendej i shtrirë përtokë dhe është dashur ndërhyrja e zv.trajnerit të Vllaznisë B dhe stafit të Korabit, për të shuar konfliktin e shkaktuar nga lojtarët miq. Me anë të telefonave dhe prononcimeve përpiqen të justifikojnë punën e tyre, ndërkohë që hedhin poshtë mundin dhe djersën e lojtarëve dhe stafit të klubit tonë. Nëpërmjet pamjeve filmike do të informojmë opinionin publik dhe do të provojmë se takimi për 93 minuta është shoqëruar vetëm me duartrokitje dhe lojë të bukur", shkruhej në reagimin e klubit dibran në "Facebook".