Peshëngritja para Botërorit, flet Zef Kovaçi: Jemi rrumpallë!
Kur mbetet dhe një javë nga fillimi i Kampionatit Europian të Peshëngritjes, që do të zhvillohet në fundin e muajit mars në Rumani, shtangistët e kombëtares shqiptare janë duke u përgatitur me seriozitet. Por për trajnerin e kombëtares, Zef Kovaçin, kjo nuk ka përkushtimin e duhur, pasi sipas tij, sportistët kryesorë, pretendentë të aktivitetit, jo vetëm që nuk po stërviten prej tij, por as në të njëjtin vend. "Jemi grumbulluar këtu ku duhet të ishin të gjithë sportistët, por në fakt këtu janë disa të tjerë, sepse Godelli, Calja e të tjerët po stërviten në vende të tjera. Nuk e kuptoj kur kemi një palestër shumë të mirë në Tiranë, përse na kanë sjellë në Durrës, ku duhet të vijmë e të bëjmë stërvitje në Tiranë e më pas të kthehemi përsëri këtu. Kjo mënyrë stërvitore e ka emrin "rrumpallë", tha Zef Kovaçi. Pavarësisht gjithçkaje, për Kovaçin sportistët shqiptarë do të jenë pretendentët kryesorë për medalje në këtë europian, nisur edhe nga mungesa e rivalëve si sportistët rusë, rumunë apo polakë, të cilët nuk marrin pjesë për shkak të dopingut. Gjithsesi, për të kjo nuk duhet të mjaftojë, sepse ky brez i peshëngritjes shqiptare rrezikon të jetë të fundit. "Këta janë djem heroikë, nuk mund të parashikoj shumë gjatë, por është e sigurt se pas këtyre nuk ka më sportistë të tillë. Të paktën për 7-8 vite peshëngritja do të jetë bosh", ka përfunduar ai gjatë një prononcimi për mediat. Gjatë këtyre ditëve janë bërë dhe dy kontrolle antidopingu nga Federata Botërore.