Dibala kapet mat në Madrid, takim me Realin
Media nis spekulimet për argjentinasin, ndërsa nga Italia e deklarojnë me pushime
Pauza e kombëtareve shkakton shumë zhurmë në lidhje me të ardhmen e Paulo Dibalës. Sulmuesi i Juventusit është pikasur në Madrid, së bashku me një mik dhe me vëllainmenaxher, prandaj vizita e tij nuk mund të kalonte pa u vënë re, sidomos për median spanjolle. Kaq ka mjaftuar që thashethemet në lidhje me një takim të mundshëm sekret me drejtuesit e Realit të Madridit të ofronin një diskutim të gjerë mbi të ardhmen e tij. Numri 10 i bardhezinjve është kapur mat në një prej restoranteve më në zë të kryeqytetit spanjoll, "Los Arroces de Segis", rastësisht ose jo, një nga vendet më të frekuentuara nga futbollistët e Realit të Madridit për të drekuar ose darkuar. Por nëse në Spanjë kanë lëshuar menjëherë "breshërinë" e lajmeve se tashmë kontaktet kanë nisur dhe se e ardhmja e tij mund të jetë Reali, nga Italia nuk kanë vonuar që ta justifikojnë me faktin se Paulo Dibala po kalon thjesht dy ditë pushimi, duke përfituar nga mosgrumbullimi i Kombëtares së Argjentinës, për dy miqësoret e 23 dhe 27 marsit. Natyrisht që, edhe pse klubi i presidentit Florentino Perez në axhendë ka si prioritete për merkaton e verës shitjen e Garet Bejlit në Premier Ligë dhe blerjen e Nejmarit nga PSG- ja, burimet sportive spanjolle konfirmojnë me bindje se juventini Dibala është gjithashtu një "copëz" e rëndësishme e planeve të Realit të Madridit, prandaj edhe kjo vizitë e Dibalës në këto ditë pushimi në tokën spanjolle nuk ka qenë rastësore, aq më shumë në prezencën edhe të vëllait-menaxher. Prandaj, Juventusi është vënë menjëherë në alarm dhe, jo më kot, javën e kaluar u përfol për përgatitjen e një plan-rinovimi të bardhezinjve, për ta blinduar lojtarin në Torino, me një pagë prej 10 milionë eurosh në sezon.