Vllaznisë i mungon 11-metërsh, Alla meritonte edhe të kuqin
Kartonë me shumicë dhe një penallti e padhënë për Vllazninë. Mund të konsiderohet një ditë negative e gjyqtarit kryesor, Eldorian Hamiti, i cili bëhet protagonist në ndeshjen Kukësi-Vllaznia, të fituar nga vendësit. Përpara se të arrijmë te rasti më i diskutueshëm i ndeshjes, le t'i marrim me radhë të gjitha momentet e dyshimta që ndodhën në stadiumin "Zeqir Ymeri".
- Në minutën e 7-të, Sidrit Guri i jep një goditje me bërryl mbrojtësit të Vllaznisë, Pjeshka. Gjyqtari lë lojën të luhet, por nga pamjet shihet se sulmuesi e ka hapur dorën më shumë sesa duhet dhe minimalisht duhet të ishte faull. Mund të shoqërohej edhe me karton të verdhë.
- I drejtë vendimi për të ndëshkuar me karton të verdhë mbrojtësin Mersini, i cili bën një ndërhyrje nga pas, drejt e në këmbët e kundërshtarit.
- Hamiti ndëshkon me karton të verdhë Ribajn dhe Sukajn për protesta, edhe pse nuk kuptohet qartë motivi.
- Tregohet i saktë anësori këtë herë për të ndalur lojën në minutën e 51- të pasi Pjeshka është më i avancuar, në krosimin e Gilman Likës.
- Në minutën e 54-t, loja duhet të ishte ndalur për një faull në dëm të Mersinit, pasi Ymeraj e ngre këmbën deri në kraharorin e kundërshtarit. Në fakt loja vazhdon...
- Pesë minuta më vonë, ekzaktësisht në të 60-tën ka një rast të dyshimtë në zonë. Rrumbullaku dhe Sukaj e prekin topin të dy me dorë brenda zonës, por në fakt duket se sfera ndalet fillimisht në dorën e mbrojtësit të Kukësit dhe më vonë devijohet nga sulmuesi i Vllaznisë.
- Rasti më flagrant në minutën e 64-t. Pas një topi të gjatë nga ana e Tafilit, Xhevahir Sukaj i vjedh kohën Allës dhe pozicionohet mjaft mirë, duke shkuar drejt topit. Nga pamjet shihet që kontakti mes palëve ka ndodhur jashtë zonës, por gjithçka intensifikohet nga mbrojtësi kur Sukaj shkon t'i afrohet topit. Ai i vendos dorën në qafë dhe këtu kemi të bëjmë me 11-metërsh. Ndoshta edhe karton të kuq për mbrojtësin, i cili nuk interesohet fare për topin dhe i heq një mundësi shënimi sulmuesit. Por, Hamiti nuk fërshëllen asgjë. Madje as faull jashtë zone.
- Hamiti ndëshkon me karton të verdhë Sukajn (i cili ishte i dyti) për të. Vendimi këtë herë është i drejtë pasi sulmuesi bën gabim që i ndërhyn Frashërit me kokë në momentin që ai e ka topin në dorë.