Tetë humbje radhazi, Lushnja kthen sytë nga të rinjtë

Të dielën e kaluar, lushnjarët regjistruan humbjen e radhës, duke rrezikuar ta mbyllin fazën e tretë pa asnjë pikë. Nga kjo fazë kanë mbetur edhe 90 minuta të fundit, që Lushnja do t'i luajë në Gjirokastër, ndaj Luftëtarit, të mërkurën e ardhshme. Verdhejeshilët njohin tetë humbje të njëpasnjëshme në kampionat duke mbetur në fund të tabelës, në një distancë të thellë me skuadrat e tjera. Ndaj Teutës, lushnjarët ishin shumë pranë rezultatit pozitiv, por u ndëshkuan në minutat shtesë, duke dalë nga stadiumi "Roza Haxhiu" përsëri pa pikë. ÇUKO - Për gazetën "Panorama Sport", trajneri i Lushnjës, Dritan Çuko shprehet: "Ekipi ka bërë një pjesë të parë të mirë dhe e konkretizoi me dy gola të shënuar. Kemi pasur mundësi të shënojmë edhe golin e tretë, por na mungoi finalizimi. Morëm një gol në fund me një penallti që e di gjyqtari. Në pjesën e dytë, ekipi ra pak nga pikëpamja e pasimeve dhe e qarkullimit të topit. Ekipi ka një gjendje të rënduar psikologjike, prandaj në çdo ndeshje kërkojmë një rezultat pozitiv për moral. Kemi bërë dy zëvendësime të detyruara. Bufasi përfundoi në spital me një dëmtim të klavikulës. Do të jetë një tjetër mungesë nga ato të shumta që kemi. Branica u largua i dëmtuar. Gjithsesi, ishim shumë pranë barazimit, por u ndëshkuam nga një goditje dënimi në fund të ndeshjes. Pavarësisht këtyre episodeve, unë mendoj se duhet ta kishim menaxhuar më mirë takimin. Me më shumë kujdes do të kishim dalë me pikë nga kjo ndeshje. Pavarësisht se ne nuk kemi dalë matematikisht, normalisht, që psikologjia bën të vetën. Ekipit i kam dhënë dy ditë pushim për t'u qetësuar dhe për shkak të ngarkesave. Ne do ta respektojmë kampionatin deri në fund. Për ndeshjen me Luftëtarin dhe për të gjithë fazën e katërt, përveç Marius Korreshit do të thërras lojtarë të tjerë nga skuadra e të rinjve", deklaroi për gazetën trajneri Çuko. Alban Alushi