Kielini braktis “axurrët” dhe fut në panik Juven

Dëmtimi, mbrojtësi rrezikon sfidat me Realin

Xhorxho Kielini braktis grumbullimin e Kombëtares së Italisë, por mbi të gjitha fut në panik klubin e Juventusit. Mbrojtësi bardhezi është vizituar dje edhe nga stafi i përfaqësueses, i cili ka urdhëruar rikthimin e tij në shtëpi, pas vlerësimit të dëmtimit të pësuar, në ndeshjen e të shtunës në kampionat kundër SPAL- it. Dhe ndërsa 33- vjeçari bënte rikthimin e tij nga Firence në Torino, uebsajti zyrtar i Juventusit lajmëronte se "tërheqje e pësuar në muskujt e kofshës së djathtë ka nevojë për analiza të tjera të specializuara, prandaj futbollisti do të rikthehet në bazë, për të pasur një ide më të qartë në lidhje me kohët e tij të rikuperimit". Nëse Kombëtarja e Italisë nuk është se do ta vuajë shumë mungesën e gjigantit të prapavijës, duke parë se sfidat me Argjentinën dhe Anglinë, respektivisht më 23 dhe 27 mars, janë thjesht miqësore, në ankth të madh është trajneri i "Zonjës së Vjetër", Masimiliano Alegri. Ky i fundit ka frikë se dëmtimi e ka vënë seriozisht në dyshim prezencën e liderit të mbrojtjes bardhezi, për dopiosfidën me Realin e Madridit, për çerekfinalet e Champions-it, më datat 3 dhe 11 prill. Kielini do t'u nënshtrohet sot analizave të tjera të imtësishme, por nëse konfirmohet se tërheqja do të jetë e gradës së dytë, Juvja nuk mund të mbështetet tek ai për

duelet e Ligës së Kampioneve. Siç raportohet, edhe vetë gjendja aktuale, shqetësimet që lojtari ndien, mund ta lërë jashtë, të paktën për duelin e parë me Realin, por shpresa është që rezonanca të lehtësojë sa më shumë ankthin e juventinëve. Pa një si Kielini ndaj spanjollëve, çerekfinalet do të bëheshin shumë të

vështira, duke menduar që për 90- minutëshin e parë, trajneri Alegri nuk do të mund të mbështetet jo vetëm te qendërmbrojtësi tjetër Benatia, por as te fantazisti Pjaniç ( të skualifikuar), apo pa harruar këtu edhe dy anësorët Kuadrado e Bernardeski, që janë ende në infermieri.