Di Biaxho: Dua të fitoj stolin e Italisë

Trajneri provizor i kombëtares

Luixhi Di Biaxho ka nisur nga dje zyrtarisht aventurën e tij si trajneri i Kombëtares së parë italiane. Ish-mesfushori, edhe pse e di mirë se ndoshta ky stol do t'i përkasë pas dy muajsh një tjetër kolegu të tij, do të kërkojë të shfrytëzojë rastin në dy sfidat miqësore ndaj Argjentinës dhe Anglisë për të marrë, pse jo, një votëbesim surprizë nga ana e drejtuesve aktual të federatës. "Nuk dua të mendoj për të ardhmen, por nuk e fsheh se dua ta shfrytëzoj në maksimum këtë rast që më është dhënë. Dua që të vë në vështirësi maksimale krerët e federatës me idetë e mia për kombëtaren e parë dhe, pse jo, të marr dhe të bëj atë që kam ëndërruar së fundmi, të jem unë trajneri i Italisë, - nënvizoi strategu i Shpresave, që po mbulon përkohësisht të dy rolet. - Objektivi dhe idetë e mia? I pari është që të ofroj një futboll të bukur, por edhe fitues njëkohësisht sepse janë këto pikat e forta që duhet për të pasur besimin e federatës. Koncepti i këtij sporti është që të tregohesh kurajoz, sepse vetëm duke pasur këtë mund të arrish futbollin e bukur dhe sukseset. Ideja ime është e thjesht, mbrojmë të gjithë, por kur sulmojmë i dua edhe mbrojtësit e krahut në zonën kundërshtare. Rikthimi i Bufonit? Xhixhi është një monument dhe në një moment kaq të vështirë për ne, një si ai më duhet jo vetëm në fushë, por akoma më shumë jas- htë saj. Pastaj, edhe pse ai vendosi largimin, ta shohësh ende në fushë është një kënaqësi, prandaj më duhet edhe mes shtyllave dhe jam i sigurt se një ndeshje do ta luajë, pse jo edhe të dyja. Mungesa e Balotelit? Ishte një zgjedhje e imja, por nuk do të thotë se për Marion dyert janë mbyllur përfun- dimisht. Shifrat e tij flasin qartë dhe është pjekur, por më duhet të testoj edhe të tjerë të rinj, si Kieza e Kutrone, dy talente të uritur që meritojnë shanset e tyre. Duam të ndërtojmë një Itali të re dhe nëse nuk testojmë talentet tanë, lodhemi më kot", tha Di Biaxho.