Lushnja, trajneri Gjyla nuk humb kurrë në... “premierë”
Premçi beson te kthesa: Shtyrja na favorizoi
Ilir Gjyla do ta drejtojë Lushnjën për herë të pestë në Kategorinë Superiore. Premierat e tij në krye të pankinës verdhejeshile kanë rezultuar gjithnjë pozitive, ndaj edhe këtë herë do të tentojë që të përsërisë suksesin. Asnjë humbje në startin e çdo aventurë me lushnjarët, tri barazime dhe një fitore, i japin të drejtë trajnerit të sapoemëruar që të kërkojë vazhdimësi. Kujtojmë që në 29 gusht të 1998-ës mposhte 4-0 Besën, më 22 shtator 2001 barazonte pa gola, në 17 prill 2004 mbyllej 2 me 2 dhe më 31 janar 2009 përfundonte 0-0.
Premçi - Pas pushimit të së dielës, lushnjarët do të zbresin në
fushë për të nisur javën stërvitore në kuadrin e ndeshjes me Luftëtarin. Nën drejtimin e Gjylës, po shfrytëzojnë këtë ndërprerje për të përgatitur sa më mirë një transfertë të vështirë përballë një prej skuadrave më të mira të kampionatit. Qendërmbrojtësi Elvis Premçi, për gazetën "Panorama
Sport", shprehet optimist para kësaj jave, ndërsa deklaron se pauza u vjen për shtat. "Kemi një javë përpara për të përgatitur ndeshjen. Ishim gati për ta luajtur të mërkurën këtë duel, por shtyrja e kampionatit na jep më shumë kohë. Kemi pasur një kalendar të ngjeshur, ndërsa tani do të presim edhe një javë tjetër për të luajtur. Do ta shfrytëzojmë këtë kohë për t'u përgatitur sa më mirë ndaj një prej skuadrave më të mira të kampionatit. Me një sulm dinamik të kundërshtarit, ne na del për detyrë të jemi sa më të kujdesshëm", u shpreh fillimisht Premçi. Qendërmbrojtësi, që këtë verë do të mbush 25 vjeç, ka luajtur 16 ndeshje me verdhejeshilët këtë sezon, pra, në total 1440 minuta. Është ndëshkuar katër herë me karton të verdhë dhe ka shënuar një gol në fitoren 3- 1 ndaj Kukësit. "Unë gjithnjë përpiqem që të bëj më të mirën time. Ka qenë një sezon fatkeq për skuadrën që është përfshirë nga dëmtime të shumta. Megjithatë, do të përgatitemi që në Gjirokastër të bëjmë një ndeshje të mirë. Edhe pse do të kemi një rekord mungesash, ekipi do të punojë për të dhënë maksimumin në këtë ndeshje. Për një paraqitje sa më dinjitoze", përfundoi Premçi. Alban Alushi