Tavo: Bisedoj me Likën, nuk kam vendosur asgjë
Luftëtari/ Flitet për një largim të trajnerit, por presidenti gjirokastrit ka version tjetër
Luftëtari firmosi zyrtarisht mesjavën e shkuar përfaqësimin në Ligën e Europës, pas fitores 1- 2 në "Roza Haxhiu" ndaj Lushnjës. Hipotekimi i vendit të tretë në klasifikim pa dyshim është sukses më vete për gjithë ansamblin bluzi. Pjesë e suksesit të gjirokastritëve është edhe "arkitekti" i Luftëtarit, Hasan Lika, i cili edhe pse nuk e nisi me "këmbën duhur" aventurën me bluzinjtë, në fund ia doli të prekte historinë. Për gjithë kontributin dhe aftësitë profesionale Lika ka marrë përgëzimet e të gjithëve në qytetin e gurtë. Në festën e 24 majit të organizuar në Pallatin e Sportit, presidenti Grigor Tavo, teksa përcolli urimet dhe falënderimet e të gjithëve për arritjen historike, mes të tjerave pati thënë: "Që historia të shkruhet, aktorët duhen përgëzuar që të gjithë pa përjashtim, komandanti (Lika) mbi të tërë". E ndërsa gara e ethshme e sezonit të sapombyllur dha verdiktin e saj, në kampin bluzi përfundimi i kontratës së trajnerit Lika në fund të majit duket se do të shndërrohet në telenovelë më vete. Ka zëra se në vend të Likës mund të vijë një trajner slloven. Pas prononcimit të Likës një ditë më parë për "Panorama Sport", lidhur me të ardhmen e tij në krye të stolit bluzi, vjen edhe reagimi i presidentit Grigor Tavo: "Unë jam shprehur edhe më parë se asgjë nuk është mbyllur për çështjen në fjalë. Jam ulur dhe do të ulem sërish në tavolinën e bisedimeve me trajnerin Lika për të sqaruar në detaje gjithçka që ka të bëjë me të qënurin e tij, ose jo, si trajner te Luftëtari. Ai (Lika) ka paraqitur kërkesat e tij, ne kemi të tonat dhe vetëm kaq. Në ditët pasardhëse gjithçka do të bëhet e ditur. Çfarë mund t'ju them më shumë?". Hasan Lika e mori drejtimin e Luftëtarit në javën e shtatë, një javë shokuese jo vetëm për trajnerin kryeqytetas, por për gjithë Gjirokastrën. Fitorja e parë nën drejtimin e Hasan Likës erdhi në shtëpi, 2-0 ndaj Lushnjës. Pas këtij trepikëshi, kurba e rezultateve të Luftëtarit të Likës erdhi në rritje duke hyrë në histori në fund, pasi siguruan pjesëmarrjen për herë të parë në Kupat e Europës. Tomor Shehu