Teuta nis skarcimet, largohen edhe 3 lojtarë
Ikin Bilali, Alhasan dhe Mustafov, 5 të huaj pezull
Edhe pse drejtuesit e Teutës akoma nuk kanë zhvilluar një analizë për sezonin që sapo u mbyll, në Durrës ka filluar operacioni "fshesa". Pas largimit të mesfushorit Ardit Hila, bregdetarët kanë ndërprerë bashkëpunimin edhe me tre futbollist të tjerë. Fjala është për Amir Bilalin, Masahudu Alhasan dhe Burhan Mustafov. Largimi i këtij të fundit ishte i pritshëm, pasi maqedonasi ka grumbulluar vetëm 306 minuta në Kategorinë Superiore dhe nuk ka dhënë ndonjë kontribut të madh në arritjen e objektivit "mbijetesë". E njëjta gjë nuk mund të thuhet për Alhasan, që ka qenë një titullar në formacionin e Begejas, ashtu si edhe Bilali. Mbrojtësi i majtë, që mund të luajë edhe si mesfushor krahu, numëron 13 ndeshje prej së cilave 12 si titullar, ndërsa ka shënuar edhe një gol. 25-vjeçari gjithashtu ka zbritur në fushë edhe në dy ndeshje në Kupën e Shqipërisë, kundër Skënderbeut. Ndërkohë Bilali luajti 17 takime në kampionat, ndërsa ka shënuar edhe një gol me fanellën e Teutës. Aktualisht, në skuadër janë pesë lojtarë të huaj, që akoma nuk dihet e ardhmja e tyre. Hugo De Marchi, Bojan Gjorgjievski, Ante Hrkaç, Anel Dediç dhe Latif Amadu. E sigurt është se edhe mesfushori De Marchi do të largohet, pasi nuk ka
lënë gjurmë te Teuta, ndërsa ka regjistruar vetëm dy ndeshje. Disi më ndryshe është situata e Gjorgjievskit, Hrkaç, Dediç apo edhe Latif, të cilët prej paraqitjeve të mira janë thuajse të konfirmuar për këtë vit. Presidenti Edmond Hasanbelliu, në një intervistë të dhënë për "Panorama Sport" ko-
hët e fundit, deklaroi se skuadra e sezonit të ri nuk do të ketë shumë lojtarë të huaj, por performancat e futbollistëve të sipërpërmendur mund t'u kenë prishur mendjen drejtuesve. "Unë kam konstatuar gjatë kësaj periudhe që është shumë e vështirë të ndërtosh një ekip kompetitiv me shumë lojtarë të huaj dhe
kjo është një nga arsyet e dështimit tonë. Në sezonin e ri boshti i skuadrës do të jetë me lojtarë shqiptarë", pati thënë Hasanbelliu. Megjithatë, në ditët e ardhshme do të ketë zhvillime konkrete edhe për Teutën e sezonit të ri, e cila pa dyshim do të ketë projekt më ambicioz. Drilon Xhepollari