Sekreti i Apolonisë, të rinjtë japin garanci

Ndërthurja e futbollistëve të rinj me ata me eksperiencë funksionoi shumë mirë këtë sezon

Sekreti i Apolonisë së sezonit 2017-2018 ka qenë alternimi i futbollistëve të përvojës me lojtarët e rinj. Në fillim të sezonit u larguan nga skuadra një numër i konsiderueshëm futbollistësh me peshë, por mbeti një bërthamë e lojtarëve të përvojës, konkretisht: Dimo, Hysenshahaj, Broshka, Çako, duke përfshirë edhe Brakën, Trokën, Andonin dhe Krasniqin. Skuadra u kompletua me futbollistë të tjerë, si: Kuçi, Duda, Velo, Llambi etj., dhe me kalimin e javëve stafi teknik filloi të mendonte për më tepër hapësira edhe për të rinjtë e ekipit, si: Sota, K. Mehmeti, Gjata e gjer tek Omeri, Grëmbi dhe Hebeja. Dhe arritja e vendit të tretë është sukses për këtë skuadër. Problemi tashmë mbetet për sezonin e ardhshëm. Cilët do të jenë lojtarët që do të largohen? A do të ruhet bërthama e lojtarëve që marrin ekipin për dore dhe që kanë aftësinë të bëhen udhëheqës edhe për të rinjtë e skuadrës? Fillimi i profilit të Apolonisë së ardhshme do të duket në ditët e para të qershorit. ANDONI - Dejan Andoni, mesfushori 23-vjeçar i skuadrës fierake, ka fituar më tepër minuta gjatë këtij sezoni. I aktivizuar 1191 minuta në 17 ndeshje, 12 prej të cilave si titullar, duke qenë dhe autor i 2 golave. Është një futbollist i disiplinuar dhe respektues i vendimeve të stafit teknik. I vetëdijshëm për mundësitë që ka, Andoni është më kërkues ndaj vetes, duke e shprehur dhe si obligim premtues për të ardhmen. "Çdo skuadër funksionon si grup ku secili duhet të bëjë detyrën e vet. Tek Apolonia kolektiviteti është i theksuar, ku gjithkush përpiqet për të dhënë më të mirën e vet. Në këtë kontekst, edhe unë jam munduar të angazhohem në maksimum sa herë kam luajtur. Apolonia ka një profil të qëndrueshëm me futbollin shqiptar që besoj se do të përforcohet dhe në të ardhmen. Sa i përket interesimit tuaj për vazhdimësinë, do të flasim në kohën dhe momentin e duhur, kur të jetë qartësuar gjithçka në komunikimin e përbashkët me drejtuesit e klubit", shprehet për "Panorama Sport", Dejan Andoni i Apolonisë. Bujar Rama