Hasalla: Po djegin të rinjtë, Lushnja e pashpresë
Blerim Hasalla, një nga ishfutbollistët e njohur të Lushnjës, në një opinion për gazetën "Panorama Sport" është shprehur se kriza që po kalon futbolli lushnjar është evidente. E ulur këmbëkryq duke u bërë sehir të gjithë dashamirësve të futbolli verdhejeshil të Lushnjës.
HASALLA
"Lushnja tregoi se ishte një skuadër shumë e dobët për Kategorinë Superiore. Kjo u pa që në fillim të kampionatit. Pavarësisht ndonjë shkëndije, skuadra ishte larg nivelit të Superiores dhe logjikisht u stakua shumë shpejt. Pra, u diferencua nga të tjerët. E mbylli kampionatin me katër herë pikë më pak se Vllaznia. Mendoj se kriza e futbollit lushnjar është në çdo aspekt. Të gjitha gjërat janë thënë disa herë dhe asgjë nuk ka ndryshuar. Edhe ky sezon që skuadra
ishte në Superiore u shoqërua nga mungesa e fushave të stërvitjes. Nga mungesa e llogaridhënies për humbjet javë pas jave. Bëhen 5, 10, 12 humbje dhe pastaj duket çudi që ekipi mori një rezultat pozitiv. Stadiumi është "tharë" nga mungesa e tifozëve. Futbolli i
Lushnjës është në kategoritë e ulëta edhe për moshat dhe nuk ka asnjë përgjegjësi për këtë gjendje. Nuk bëhet një analizë e plotë dhe të gjenden mundësitë për të dalë nga gjendja. Pse ka munguar elementi i ri ose pse është djegur. Unë kam
qenë trajner i ekipit të të rinjve për një sezon dhe, pasi ekipi siguroi ngjitjen në Superiore, më larguan. Nuk afruan asnjë element të ri. Pra, që të qëndrosh, duhet të humbasësh. Kriza e futbollit lushnjar është ulur këmbëkryq dhe po shohim një situatë të pandryshuar që
u bën sehir njerëzve që duan futbollin", është shprehur në opinionin e tij për gazetën ishfutbollisti i njohur Blerim Hasalla.
PAPA
Lushnja e drejtuar nga Ilir Gjyla do të qëndrojë në stërvitje, ndaj sot në "Roza Haxhiu" do të jetë dita e parë e vëzhgimit e lojtarëve që mendohet të jenë verdhejeshil për sezonin e ardhshëm. Te Lushnja ka disa largime të konfirmuara nga vetë lojtarët. Në dyshim për sezonin e ardhshëm është edhe mesfushori Enriko Papa, i cili për gazetën "Panorama Sport" u shpreh: "Sot do të sqarohen të gjitha, por deri më tani kam pasur 5- 6 oferta si nga Kategoria Superiore ashtu edhe nga jashtë vendit. Dhe, vështirë se do të vazhdoj me Lushnjën. Por, sot, do të sqarohen të gjitha", është shprehur Papa. Alban Alushi