“Gafa” e Anglisë zbulon pa dashje formacionin kundër Panamasë
Sterling ulet në stol, e zëvendëson Rashford
Rahim Sterling rrezikon që të lihet jashtë ndeshjes kundër Panamasë nga Garet Sauthgejt ditën e diel. Mediat angleze kanë fotografuar një skemë të asistentit të trajnerit të Anglisë, Stiv Hollënd, e cila dyshohet se është formacioni i ndeshjes së dytë të Grupit G për "Tre Luanët". Hollënd, i cili është një nga njerëzit që e motivon Sauthgejtin për të mos zbuluar asgjë rreth formacionit përpara ndeshjeve, ironikisht bën një "gafë", e cila mund t'u ketë dhënë informacion shumë të vlefshëm rivalëve. Risia nga ndeshja e parë kundër Tunizisë është se Rahim Sterling e ka humbur vendin e tij të titullarit dhe pritet të zëvendësohet nga sulmuesi i Mançester Junajtid, Markus Rashford. Ndërkohë që ndryshimi i dytë, i pritshëm prej disa ditësh është se Ruben LoftusÇik do të zëvendësojë të dëmtuarin Dele Ali ( që në letër duket se Hollënd ia ka shkruar emrin gabim, me një "l"). PARASHIKIMI I BEKHAM - Ish- kapiteni i Anglisë, Dejvid Bekham, i cili u ndëshkua me karton të kuq në eliminimin e "Tre Luanëve" në ndeshjen e dramatike të "Francë 1998" kundër Argjentinës (1/8-at) kërkon një finale kundër Mesit. Ai mendon se skuadra e Garet Sauthgejtit është e destinuar për të shkuar deri në ndeshjen e fundit të turneut dhe do të përballet sërish me rivalët e vjetër (ndaj të cilëve ai mori hak me penalltinë fituese në ripërballjen e 2002): "Besoj se Argjentina do të luajë kundër Anglisë në finale. Uroj që vendi im ta fitojë atë. Jam shumë i lumtur që e fituam ndeshjen e parë në grup. Anglia është një skuadër shumë e re, ata nuk kanë ende shumë eksperiencë dhe Botërori do të bëhet gjithnjë e më i vështirë, sepse ka shumë ekipe të forta në qarkullim".