Interi kërkon Suson, “Djalli” pret ofertën

Zikaltrit, gati të përfshijnë lojtarë për të ulur çmimin

a shijuar ende mirë suksesin e një akordi siç ishte ai për Raxha Naingolan, Interi hidhet përsëri në sulm në merkato. Preja këtë herë është po aq "majme" sa belgu i Romës, pavarësisht se rasti paraqet pak më shumë vështirësi. E gjitha kjo, sepse bëhet fjalë për Hezus Suson, sulmuesi i krahut dhe një nga yjet e Milanit. Zikaltrit nuk duan as t'ia dinë e as të presin vendimin e UEFA- s ndaj kushërinjve ( rrezikojnë sanksione dhe përjashtim nga Europa) dhe po mendojnë të shfrytëzojnë klauzolën e 24-vjeçarit.

KLAUZOLA- Pak muaj më parë, në momentin e rinovimit të kontratës së Susos, drejtuesit kuqezi vendosën një klauzolë prej 38 milionë eurosh. Është pikërisht çmimi i paracaktuar, objektiv i Interit që duke derdhur shumën në arkat kuqezi, mund ta bëjë të vetin lojtarin. Kontakte mes klube mësohet se nuk ka pasur e aq më pak oferta konkrete, siç kanë spekuluar disa media, por ai që po end rrjetin e komunikimit është agjenti i lojtarit, Alesandro Luçi. Në kuadër të kësaj çështjeje, mësohet gatishmëria e klubeve për të komunikuar me Interin që do të synojë të ulë vlerën e operacionit duke përfshirë në bisedime Antonio Kandrevën. Ky i fundit, nëpërmjet një komunikimi në rrjete sociale, ka bërë të qartë vullnetin e tij për të mos u veshur kuqezi, por "kur paraja flet, duhet heshtur" thotë një fjalë e urtë.

ALTERNATIVAT E SUSOS - Megjithëse Suso mbetet një nga "të palëvizshmit" e Milanit, kuqezinjtë duhet të marrin masa. Për të zëvendësuar

spanjollin, alternativa kryesore mbetet Kajehon i Napolit, i cili në nivel karakteristikash do të ishte një duplikatë ideale e bashkëkombësit. Një tjetër profil interesant dhe më pak i komplikuar është ai i Metju Lekit. Mesfushori ofensiv i Hertës së Berlinit po zhvillon një Botëror fantastik me Australinë, pavarësisht se "Kangurët" kanë regjistruar një humbje dhe një barazim në dy takimet e para.