Tirana prezanton bomberin maqedonas
Prezantohet blerja e parë për projektin "Superiore", numri i sulmuesve shkon në... 7
Tirana nis më në fund merkaton. Dejan Blazhevski është blerja e parë e bardhebluve për projektin "Superiore". Maqedonasi ka zbarkuar dje në Shqipëri, jo vetëm për të nënshkruar marrëveshjen me ekipin e tij të ri, por edhe për t'u prezantuar në stadiumin "Selman Stërmasi". Klubi me anë të një videoje të postuar në faqen zyrtare, ka konfirmuar edhe lajmin e publikuar në numrin e 16 qershorit prej "Panorama Sport", ku njoftohej akordi paraprak me 32-vjeçarin. DETAJET E KONTRATËS Ish-lojtari i Vardarit ka firmosur kontratë sezonale, por me opsion rinovimi për një tjetër vit. Sakaq, gazeta zbulon se ai do të përfitojë një pagë që shkon në 5 mijë euro në muaj. Sulmuesi, në fakt, këtë standard ka pasur edhe kur ka luajtur në Maqedoni, ndërsa rrogën nuk e kishte më pak se 5-6 mijë euro. Karriera e tij është realisht e pasur dhe mjafton që të shohësh CV-në për ta vërtetuar, kur veç 4 sezoneve me Vardarin, ka luajtur edhe për disa ekipe greke e azere. Kishte një lloj skepticizmi për shkak të moshës, e megjithatë performanca e tij te kuqezinjtë maqedonas, ka dëshmuar se vitet për të janë thjesht numra. Gjithsesi, Blazhevskit nuk i mbetet gjë tjetër veçse ta tregojë
veten në fushë dhe me gola. SULMI I BLINDUAR Në kësi kushtesh, kryeqytetasit "blindojnë" ofensivën. Bashkë me Blazhevskin që mund të luajë jo vetëm si qendërsulmues, por edhe sulmues i majtë, numri i lojtarëve për këtë repart
shkon në 7. Ngoo, Sentamu, Greca, por edhe të rinjtë si Halili, Bardhi dhe Muçi, janë ata që do të garantojnë golat për të kapur majat në Kategorinë Superiore. Sigurisht që nuk mund të quhet e mbyllur me sulmin, pasi nuk përjashtohet mundësia që
klubi të rezervojë edhe ndonjë surprizë të radhës. KARRIERA E PASUR
Ai është produkt i Vardarit, megjithatë futbollin si profesionist e ka nisur me Pelisterin, ku është aktivizuar për 57 ndeshje dhe shënoi 12 gola, më pas kaloi
në Greqi ku luajti për Agrotikos Asteras (64 ndeshje, 8 gola), Verian (29 ndeshje, 2 gola) dhe Pierikos ( 34 ndeshje, 2 gola). Pas aventurës në tokën helene u kthye në Maqedoni në 2012ën, ku për dy sezone u bë pjesë e Turnovos ( 50
ndeshje, 37 gola). Pas eksperiencës në Strumicë u zhvendos në Azerbajxhan, por atje qëndroi vetëm një vit. Që nga 2015-ta e deri më tani, mbrojti për Vardarin. Sakaq, me kombëtaren maqedonase numëron 4 takime dhe 1 gol.