REAGIMET Nga Meta tek Ambasadorja e SHBA-ve, ja si festoi politika
Presidenti i Republikës, Ilir Meta, organizoi një "fun club" për tifozët, të cilët ndoqën ndeshjen Zvicër- Serbi. Pas ndeshjes, Meta realizoi një lidhje nga Presidenca me emisionin "Debati në Channel One". Veç të tjerave, gazetari i "Panorama Sport", Skerdilaid Sulozeqi, i cili ishte i ftuar në këtë studio e pyeti presidentin se nëse do të gjuante një penallti dhe Shqipëria do të shkonte në Botëror, me cilën këmbë do ta gjuante penalltinë me të majtën apo me të djathtën. Ja përgjigjja e presidentit: "Pyetja është tepër provokuese. Mbaj mend se kur ishim tifozë dhe ishim fëmijë të vegjël, luante Agim Murati. Ai ishte një futbollist i jashtëzakonshëm që i bënte golat me kokë dhe zakonisht ishte një tifoz i njohur i Partizanit, që sa herë kishte një problem thoshte penallti arbitër, ta gjuajë Murati me kokë. Unë do preferoja më mirë ta gjuaja me kokë", u shpreh Meta. POLITIKA - Gjithashtu, politika është bërë bashkë në urimet ndaj Xhakës dhe Shaqirit, teksa në rrjetet sociale kryeministri Edi Rama dhe ish-kryeministri Sali Berisha kanë shpërndarë fotot e djemve shqiptarë. Nga ana tjetër, shtypi serb ka kritikuar postimet e politikanë kosovarë. "A do të mundin djemtë tanë ta mundin Serbinë? Besoj se po", shkroi para ndeshjes, Behgjet Pacolli, ministri i Jashtëm i Kosovës. Kurse Flora Çitaku, Ambasadore e Kosovës në USA, shkroi: "Dy shqiptarë të Kosovës kanë vendosur fitoren e Zvicrës ndaj Serbisë. Familjet e tyre kanë shkuar në Zvicër gjatë kohës së luftës, sot (dje) ata shënuan dhe fituan. Sporti ndonjëherë është më shumë se sport. Jeni pjesë e historisë, ju dua shumë".