Skarcoi Uillianin, por Kosta humbet Serbinë
Alarm në krahun e djathtë, Danilo humbet Botërorin
Zhvilloi 45 minuta shumë të mira kundër Kosta Rikës dhe mund të ishte një lajm shumë i mirë për trajnerin Tite në prag të ndeshjes së fundit në grupe, por muskujt e lënë në "baltë" Duglas Kostën. Sulmuesi i Juventusit ka pësuar një tërheqje muskulore në kofshë në fundin e ndeshjes me Kosta Rikën dhe nga analizat paraprake rezulton se ai nuk do të jetë i gatshëm për duelin e fundit në grupe me Serbinë. Për fat të keq, Tite duhet t'i besojë sërish Uillianit, edhe pse statistikat e ndeshjes së të premtes ishin pro Duglasit. Lajme aspak të mira vijnë për mbrojtësin Danilo, i cili me shumë mundësi nuk do të rikthehet më në fushën e lojës për këtë kompeticion pasi rikuperimi kërkon kohë.
Fitoi duelin- Të gjitha të dhënat e ndeshjes ishin pro Duglas Kostës dhe kjo do të thotë se ai mund të ishte titullar për ndeshjen e fundit në grupe, por dëmtimi do ta lërë jashtë. Ai nuk do të grumbullohet fare dhe lajmin e bëri të ditur mjeku i skuadrës së Brazilit, Rodrigo Lasmar.
Brazili fitoi më shumë shpejtësi nga krahu i djathtë, dërgoi më shumë topa dhe arriti të ndërtonte më shumë aksione me prezencën e Duglas Kostën. Edhe pse ai fitoi duelin me shokun e skuadrës për
një vend titullari, në ndeshjen kundër Serbisë nuk do t'ia dalë për shkak të problemit muskulor.
Danilo- Krahu i djathtë duket se është i "mallkuar" për Brazilin në këtë kampionat
Botëror. Në fillim u dëmtua Dani Alvesh dhe humbi "biletën" për në Rusi, ndërsa tani edhe zëvendësuesi i tij Danilo ka probleme fizike. Mbrojtësi i Mançester Sitit humbi ndeshjen kundër Kosta Rikës, por mendohet se dëmtimi është akoma më i rëndë. Danilo mund të ketë humbur kampionatin Botëror dhe ndoshta nuk do të rikthehet më në fushën e lojës për këtë kompeticion. Tite ka në dispozicion vetëm Fagnerin, i cili kundër Kosta Rikës rezultoi një surprizë e bukur dhe dha kontributin e tij në krahun e djathtë. Por Brazili fillimisht duhet të sigurojë zyrtarisht kualifikimin për në raundin tjetër dhe ndeshjen e fundit e luan kundër Serbisë që është një ekip i fortë dhe do të provojë të bëjë maksimumin për të luajtur shanset e saj për kualifikimin. Tani Tite duhet t'i bëjë llogaritë pa 2 lojtarë për këtë ndeshje.