Besëlidhja nis merkaton, qëndrojnë guineasit
Afrikanët: Jemi gati ta ngjisim skuadrën në Superiore
ashmë që ka një emër konkret në krye të pankinës së Besëlidhjes, nuk mbetet gjë tjetër veçse ndërtimi i formacionit për sezonin e ri, ku pa dyshim që do të luftohet për një vend në Superiore. I pari që ka firmosur kontratën me Besëlidhjen pas trajnerit është portieri shkodran, Fabjol Rexhepi, i rikthyer pas një sezoni te Tërbuni. Nga futbollistët që janë në planet e Besëlidhjes për të mbetur pjesë e saj janë kontingjenti i futbollistëve guineas ku dy prej tyre nuk janë larguar nga Lezha as për pushimet verore, por kanë preferuar që t'i kalojnë në Lezhë. Konkretisht, po pushojnë në Lezhë mbrojtësi Isakia Kamara dhe mesfushori Çeik Konte që janë të gatshëm ta vijojnë kontratën me Besëlidhjen të paktën edhe për sezonin e ri. KAMARA
Në një prononcim për gazetën, mbrojtësi Isak Kamara shprehet: "Sezoni që lamë pas ku unë isha pjesë e Besëlidhjes, ndonëse ishte mjaft i lodhshëm nga të gjitha pikëpamjet, përsëri unë jam ndier mirë. Ndonëse nuk ia dolëm që të kapnim objektivat, përsëri Besëlidhja ia doli që të ishte në 5- shen e parë. Unë jam i vendosur që ta vijoj kontratën me Besëlidhjen dhe për këtë jam i kënaqur, por deri në mbyllje të merkatos nuk mund të deklaroj prerazi, pasi ndonjë ofertë tunduese mund edhe të më ndryshojë mendje, gjithsesi besoj se do mbetem pjesë e kësaj skuadre", e mbylli bisedën e tij për gazetën, mbrojtësi guineas, Isak Kamara.
KONTE
Ndërsa, mesfushori Çeik Konte u shpreh: "Ndonëse unë te Besëlidhja nuk i kam luajtur një pjesë të sfidave si titullar, përsëri këtu e kam ndier veten shumë mirë, pasi ende jam në hapat e mia të para në karrierën e bukur të futbollit. Tani jemi në sezon pushimesh, por së bashku me kolegun dhe bashkëkombësin tim Isak vijomë stërvitjen individuale çdo ditë, si në ambientet e stadiumit, po ashtu edhe në bregdetin e Shëngjinit. Besoj se edhe sezonin e ri do të mbetem pjesë e Besëlidhjes, ndonëse kam pasur disa oferta. Shpresoj se sezonin e ri Besëlidhja do të riorganizohet edhe më mirë dhe të luftojmë deri në fund për ngjitjen në elitë", tha Konte. Ndërkaq, pritet që skuadra të nisë në korrik grumbullimin për t'u përgatitur për sezonin e ardhshëm.