“Shqiponja” e Xhakës dhe Shaqirit, FIFA nis hetimin
Mbledhje urgjente të Zvicra, federata helvete doli "huq"
Serbia dhe Rusia u bënë edhe një herë bashkë për të kërkuar diçka të pretenduar. Dy federatat, siç raportojnë mediat ndërkombëtare, kanë bërë një ankesë në FIFA për ngjarjet në ndeshjen Serbi-Zvicër. Festimi i dy shqiptarëve Xherdan Shaqiri dhe Granit Xhaka, duke formuar shqiponjën me duar, është komentuar si provokim politik prej tyre dhe tashmë FIFA është vënë në lëvizje.
Procedim - Lojtarët me origjinë shqiptare të Zvicrës, që përmbysën edhe Serbinë mbrëmjen e kaluar, Granit Xhaka dhe Xherdan Shaqiri, do të jenë subjekti i një hetimi të hapur nga trupi disiplinor i FIFA-s, pas festimeve të tyre me simbolin e shqiponjës. Në një deklaratë të nxjerrë nga FIFA mbrëmjen e së shtunës thuhet: Komisioni Disiplinor i FIFA-s ka hapur një procedurë disiplinore ndaj lojtarëve të Zvicrës, Granit Xhaka dhe Xherdan Shaqiri, për festimet e tyre të golave kundër Serbisë. Në lidhje me të njëjtën ndeshje janë hapur edhe procedura disiplinore ndaj Federatës së Serbisë, për shfaqje të mesazheve politike nga ana e tifozëve serbë, si dhe për rrëmujë tifozësh. Gjithashtu, një hetim është hapur edhe kundër trajnerit të Serbisë, Mladen Krstajiç, për deklaratat e bëra në përfundim të ndeshjes", ka njoftuar FIFA.
Mbledhja - Më herët, gjatë pasdites së djeshme, helvetët u grumbulluan në mbledhje. Stafi dhe skuadra kombëtare u bënë bashkë për të diskutuar rreth asaj ç'ka ndodhur. Në një konferencë për shtyp, sekretari i përgjithshëm i Federatës Zvicerane të Futbollit ka konfirmuar se po e ndjekin me jo pak shqetësim situatën. "Kemi folur për festën e tyre dhe mund të bëhet diçka, por emocionet nuk mund t'i ndalojmë. Sigurisht që ka vend për të diskutuar ende, por unë nuk mund të mendoj ndëshkimin e tyre nga FIFA. Nuk besoj se ka vend për masa, pasi nuk kemi asnjë sinjalizim të tillë", ka deklaruar Aleks Misher gjatë pasdites dhe duket që ka dalë "huq", pasi në mbrëmje ka ardhur edhe sinjalizimi nga FIFA për nisjen e procedimit disiplinor.