Deshamp: Jemi një ekip i çmendur
"Mundëm një Argjentinë të madhe. Kritikat? Fusha tregon gjithnjë të vërtetën"
Didie Deshamp shi jon suksesin dhe të paktën për një ditë nuk mendon t'u përgjigjet kritikave. Duke folur pas fitores me Argjentinën, trajneri francez deklaroi: "Jam i lumtur sepse prej muajsh përgatitem për ndeshje të këtij niveli. Kritikat nuk do të mungojnë asnjëherë, por e vërteta është ajo që shihet në fushë. Ndiheshim mirë dhe donim të bënim një ndeshje të madhe. Duke parë rezultatin, mendoj se ia dolëm mbanë dhe në mënyrën më emocionuese të mundshme".
Teksa shtypi "kursen" transalpinët, është vetë tekniku i tyre që nuk ngurron të flasë për defektet e të tijve. "Ishte një përballje mes gjigantësh, por pati edhe disa gabime. Kur ishim në disavantazh ( 1- 2) patëm një moment hutimi, por u treguam të zotë, duke marrë vendimet e duhura. Kur je në vështirësi, duhet të bësh gjërat e thjeshta. Ishte pikërisht falë kësaj thjeshtësie që përmbysëm rezultatin, ndaj ndihem shumë i kënaqur me mënyrën si e zgjidhëm sfidën", tha 49-vjeçari.
Me takimin e djeshëm ai u bë trajneri që ka drejtuar Francën me më shumë ndeshje. Falë kualifikimit seria e Deshamp është e destinuar për të qenë më e gjatë, të paktën me një ndeshje, në rastin më të keq. Nuk janë prezencat e tij, ato që e shqetësojnë me trajnerin që nuk ngurron të komplimentojë edhe rivalët. Siç shpjegoi edhe në fjalën e tij, ajo ndaj Argjentinës nuk ishte një ndeshje me favorite: "Duhet të jepnim një sinjal të vlerave tona dhe më duket se e bëmë. Ishte një përballje shumë e komplikuar mes dy ekipeve cilësore. Argjentina ka një skuadër me përvojë, e cila e tregoi se nuk dorëzohet lehtë, kur me dy gola e ktheu ndeshjen në favorin e saj. Ne u treguam pak më të zotë, duke i vënë në vështirësi dhe duke fituar ndaj mendoj se kualifikimi ishte i merituar. Jemi një ekip i çmendur". Për një ish-kampion bote suksesi nuk ka receta, teksa Deshamp shpjegoi se çfarë priste nga skuadra: "Duhet të mendojmë të çlodhemi dhe të rifitojmë energjitë e shumta që shpenzuam sot (dje). Nuk duhet të lejojmë që të na pushtojë euforia, por kam besim te djemtë sepse i shoh shumë të përqendruar dhe të uritur".