Ronaldo: Largohemi me kokën lart nga Botërori
“Luajtëm më mirë, por shënuam më pak. E ardhmja...”
byllja e Botërorit për Ronaldon e vënë pikëpyetje vazhdimësinë e tij me përfaqësuesen për një tjetër edicion pas katër vitesh. E ndërsa CR7-a mediton fundin në një kompeticion të tillë, është trajneri i Portugalisë që thekson se ai është ndihmë e madhe për skuadrën dhe se ka ende shumë për të shfaqur me përfaqësuesen. Në deklaratën pas ndeshjes, kapiteni i Portugalisë ka folur për kompeticionin.
HUMBJA - "Kemi luajtur më mirë sesa Uruguai, por për fat të keq ata shënuan më shumë. Donim shumë që të fitonim dhe të vijonim më tej, skuadra u përpoq dhe bëri maksimumin për këtë, por nuk ia dolëm. Pavarësisht humbjes, ne ikim me kokën lart nga ky Botëror. Unë jam krenar që jam kapiten i Portugalisë. Në këtë skuadër ka një punë grupi fantastike dhe është një skuadër që funksionon në mënyrë perfekte. Nuk është çfarë donim në total, por kam mbetur i surprizuar nga ky kompeticion në aspektin pozitiv. Ishte organizim i mirë dhe e kam shijuar. Përgëzime për Uruguain. Për të ardhmen flas në fund të Botërorit", deklaroi Ronaldo.
TRAJNERI - "Të gjithë donim të fitonim. Sigurisht që eliminimi na trishton shumë. Nuk mund të mos i përgëzoj lojtarët, pasi dhanë më shumë sesa maksimumin e forcës së tyre. Kemi bërë një pjesë të dytë shumë të mirë dhe tentuam me çdo kusht që të shfrytëzonim
rastet që krijuam. Ishte e vështirë, pasi patëm pak hapësira dhe në fraksionin e dytë kemi pësuar gol nga vetëm një goditje e kundërshtarit. Mund të them se arritëm objektivin minimal. Donim patjetër që të kalonim grupet dhe ia dolëm. Më pas, dëshira ishte që të qëndronim
sa më gjatë në këtë kompeticion deri në fund. Ronaldo? Ai ka akoma shumë për të dhënë për Portugalinë. Kemi një skuadër me shumë lojtarë të rinj dhe kemi nevojë më shumë se kurrë për kapitenin tonë. Ai ka qenë gjithmonë në dispozicion të përfaqësueses dhe në shtator
nis një kompeticion i ri, të cilin duam ta fitojmë. Ai u përpoq që të driblojë, që të shfaqet në çdo cep të fushës dhe që të shënojë. Asnjë skuadër nuk mund të fitojë me vetëm një futbollist të vetëm. Ronaldo dha kontributin e tij dhe na udhëhoqi përpara", deklaroi Santos.