Turqia bën bashkë Mavrajn dhe Sadikun
Sulmuesi pranon bisedimet, mbrojtësi e zgjidh për... dy ditë
Tregu i transferimit të futbollistëve ka bërë që shumë prej lojtarëve të Kombëtares të bëhen bashkë në ekipe apo edhe kampionate. Superliga turke është bërë "tokë e artë" për shumë prej lojtarëve të përfaqësueses. Së fundmi, Armando Sadiku dhe Mërgim Mavraj mund të shtohen në këtë ligë për edicionin e ardhshëm. MBROJTËSI
Mërgim Mavraj dhe tre lojtarë përfaqësueseje të Hamburgut kanë pasur dje afatin për t'u rikthyer në Gjermani. Angazhimi me ekipet kombëtare u ka dhënë atyre mundësinë për të pushuar disa ditë më tepër, ndërsa skuadra gjermane ka nisur prej disa ditësh përgatitjet. Mirëpo, dje, Mavraj nuk është paraqitur në qendrën stërvitore. Mediat pranë Hamburgut kanë bërë me dije se shqiptari ka edhe dy ditë leje të veçantë me arsyen për të zgjidhur situatën që ka të bëjë me të ardhmen e tij. Mavraj, brenda të enjtes, do të duhet që të mbyllë diskutimet në rast të një transferimi të mundshëm në një skuadër tjetër. Nga sa bëhet me dije, Trabzonspori është futur fuqishëm në garë për shërbimet e mbrojtësit të Kombëtares dhe e sheh si përforcim të rëndësishëm për prapavijën. Gjithçka pritet që të zyrtarizohet në 48 orët e ardhshme. SULMUESI
Sokol Cikalleshi nuk do të jetë i vetmi sulmues në kampionatin turk. Rizespor, i sapongjitur në elitë, ka kërkuar shërbimet e Armando Sadikut. I ftuar në emisionin sportiv në "SuperSport", sulmuesi ka pranuar mundësinë e transferimit: "Po, është e vërtetë që Rizespori po flet me Levanten dhe bisedimet vazhdojnë. Unë jam në pritje dhe kam lënë gjithçka në dorë të klubeve. Jam i lumtur në Spanjë, por nuk i dihet të ardhmes. Të shohim. Di që pas disa ditësh do të nis fazën përgatitore me Levanten, pastaj nëse klubet bien dakord…", ka treguar Sadiku.