Alegri “mister lumturia”: Tani marrim Champions-in
“Nuk e dija për Kristianon kur refuzova ofertën e Perezit”
asimiliano Alegri është njeriu më i lumtur në botë ose, më mirë, trajneri më i lumtur në botë. Pas pak ditësh do të ketë nën urdhrat e tij Kristiano Ronaldon dhe bashkë me të do të projektojë rrugën për të arritur sukseset. "Mendoj se Kristiano Ronaldo është një blerje e rëndësishme dhe një hap i madh kualiteti nga ana e të gjithëve, shoqërisë dhe ambientit. Kur të bashkohemi të gjithë do të vendosim synimet e një sezoni. Për mua të gjithë vitet janë një cikël i ri, sepse Juventusi në katër vitet e fundit ka ndryshuar shumë. Këtë herë kemi bërë një merkato të rëndësishme", tha fillimisht Alegri. Në një prononcim për mediat, trajneri bardhezi shprehu vlerësimet për drejtuesit e skuadrës për një transferim të tillë, por pranoi gjithashtu se tani do të jetë patjetër Liga e Kampionëve objektiv i "Zonjës". Me Kristiano Ronaldon në skuadër të gjithë do të kenë më shumë besim për të arritur diçka të tillë.
DUKE SHËNUAR- "Nuk kam folur ende me Ronaldon në telefon. Mendoj se do ta takoj të hënën kur të jetë konferenca. Di që është shumë i lumtur, një profesionist i vërtetë dhe një vlerë e shtuar për klubin. Shoqëria dhe presidenti kanë bërë diçka të shkëlqyer për Juventusin, por mbi të gjitha për futbollin italian. Si do të luajë? Si gjithmonë duke shënuar".
CHAMPIONS- "Objektivi për të fituar Ligën e Kampionëve është gjithmonë për Juventusin, por blerja e Ronaldos na jep më shumë besim dhe vetëdije për ta arritur. Por Champions- i nuk është objektiv i vetëm. Duam Superkupën, kampionatin dhe Kupën e Italisë. Juventusi ka detyrim të luajë në të gjitha frontet dhe të fitojë gjithçka".
REFUZIMI- "E dija që do të më pyesnit për refuzimin e Realit, por unë ndoqa thjesht instinktin tim dhe nuk e dija që do të vinte Ronaldo. Për mua nuk ka qenë verë e lehtë, sepse një muaj më parë u nda nga jeta nëna ime dhe më duhet të bëja disa zgjedhje. Por fola me Juventusin dhe këtu ndihem mirë. Dua ta falënderoj presidentin Perez që më kërkoi. Por unë kisha diskutuar me skuadrën time dhe kishim një projekt interesant".